ياسلامي عليكم يارجال الحميه
مساكم الله بالخير
ياسلامي عليكم يارجال الحميه=من هاجوسن لها بالطيب سلم ومبادي والله اني على الميدان سقت المطيه=ياهل الملعبه تكفون وين ابن بادي |
رد: ياسلامي عليكم يارجال الحميه
مرحبا ياهلا ترحيب نفسٍ رضيه=من فصيح اللسان ومن نظيف الفوادي لا تواجدت تلفن يارفيقي عليه=رنةٍ ما تضر الجيب والرزق بادي |
رد: ياسلامي عليكم يارجال الحميه
حياك ابوعزيز.. علومك اخبارك.
عشت ياللي على الميقاف رجله جريه=ترثة امروية بالكون بيض الهنادي ابشر اما يجي لك صبح والا عشيه= ميرابا انشد بعد ذعذع نسيم البرادي |
رد: ياسلامي عليكم يارجال الحميه
حياك وياهلا وغلا..اخباري تسرك ابشرك
عشت ولا عليكم زود ياهل الوفيه=يابيض الوجه ما يلحق جبينك سوادي ان نشدتوا فانا باتم عيشه هنيه=ما يكلف على الرجلين مشي القصادي |
رد: ياسلامي عليكم يارجال الحميه
صح لسانك
ريس البيت الابيض له ثلاثين نيه=قام ايجامل عرب على حساب المهادي والله انه وصلني بالاذا والاذيه=قام ياطا السريح امن اللعانه عنادي |
رد: ياسلامي عليكم يارجال الحميه
ياااااااسلالالالالالالام ياسلام
يحسب ان خطته في جوتانامو خفيه=مادرى ان مقصده مكشوف والرشد غادي الأوادم تعرف العلم ماهي غبيه=لو يحشد الجموع ولو يصيح وينادي |
رد: ياسلامي عليكم يارجال الحميه
صح لسانك .. لكنك لازلت مصمم.. تراك واهم على العموم استلم
انت منته لحالك في ملف القضيه= اخذ من العلوم امبرهنه والوكادي مير واشيب عيني ملكوه البنيه=بنت من زينها تسوى جميع البلادي |
رد: ياسلامي عليكم يارجال الحميه
علي راحتك ... ولا تزعل.. ما حصل الا الخير ..نسحب الكلمه
ما لحقني من الأيام ضيم ورزيه=احمد الله واشكر فضل رب العبادي وش عليه لو ان ابليس ركب اردعيه=ما يثور عظام اشعيل مص القرادي |
رد: ياسلامي عليكم يارجال الحميه
صح لسانك..هههههه
قاله و نفسه امن الوقت ماهي صريه=سالفه بثها ومفصله كل رادي ياحمد تقل مابه هضبه الا طميه= تقل مالك جواد وتقل مالك جوادي |
رد: ياسلامي عليكم يارجال الحميه
صح بدنك طال عمرك
مادري من هواه او هو موصى وصيه=والسوالف ليا برقت كثر الجرادي مانت قادر تداوي شوف عينٍ عميه=من يضل الولي ماله من الناس هادي |
رد: ياسلامي عليكم يارجال الحميه
صح لسانك
ياوسيع المعرفه علتن باطنيه=ولعت بي وانا معلن لك الله حيادي رايك اصبر وارد السيف والنافعيه=والااشبه وولع نارها من زنادي |
رد: ياسلامي عليكم يارجال الحميه
والله اني لحضنك فاليدين النديه=انت شفي و مقصودي وغاية مرادي مير انا كل ما قابلك تنحي نحيه=ما دري ويش قصدك بالجفاء والبعادي |
رد: ياسلامي عليكم يارجال الحميه
صح لسانك
كلمتك ياحمد مابين هذي وذيه=تحتها خط يعني لحقها الانتقادي اصبروا لين تجلى الليله الخرمسيه=وابشر ابما يسرك ياندي الايادي وبيض الله وجهك وما قصرت واسمح لي ودي ارقد وحط ردك انتظره وبعدها تصبح على خير لك خالص شكري |
رد: ياسلامي عليكم يارجال الحميه
لا تجي مثل راع النيه القلبيه=بعد راع الشداد اقفى وعاف الشدادي جيٌتك لي هدية عمر واكبرهديه=مير واطول ليل الهجر وا طول مادي |
رد: ياسلامي عليكم يارجال الحميه
وانت من اهل الخير وصح السانك ولا عدمناك |
رد: ياسلامي عليكم يارجال الحميه
صح لسانك ولاعدمناك ويعطيك العافيه يابوعزيز
والله اللعب معك مايمل.. تصبح على خير |
رد: ياسلامي عليكم يارجال الحميه
صح لسانكم جميع
والله اني استمتعت بقراءة هذي المحاورة الجميلة لكم من كل التقدير والاحترام |
رد: ياسلامي عليكم يارجال الحميه
السلام عليكم ورحمة الله
يالله قوهم والله اللعب ياربع صح لسانك يالذيب لو أني اشره عليك ياخوي كز رساله خاصه علمونا عن مكانكم كل يوم لكم في مكان والشرهه الكبرا على صاهود اللي ماعلمنا ولا بالعاده يعلمنا عن المكان صح لسانك ياشاعرنا ابو عزيز والله انك شاعر ولا يهون الشاعر الذيب اليله الليه اوريك بصاهود اللي مايستحي ما يعلمنا عن مكانهم |
رد: ياسلامي عليكم يارجال الحميه
صح لسانك ابو عبدالعزيز ..صح لسانك يالذيب امتعتونا بالمحاوره الجميله.. ياسلام هذا والله اللعب تقبلو شكري |
رد: ياسلامي عليكم يارجال الحميه
الله يعطيكم العافيه .. والله انكم هيضتونا ... والله ان الشطر عن قصيده .. الله يعطيكم العافيه ولاتحرموننا من ابداعاتكم ..
|
رد: ياسلامي عليكم يارجال الحميه
الأخوه .الأعزاء علي الخطيب خريزاوي ssssss شاعر عنيزه مشكورين ومجملين علي مروركم الكريم وتعليقاتكم الجميله لاهنتوا وصحة ابدانكم ليتكم معنا بالصفوف البارح افتقدناكم والله.لكم وحشه تحياتي لكم جميعاً .ولا عدمناكم |
رد: ياسلامي عليكم يارجال الحميه
علي الخطيب..خريزاوي...ssssss...شاعر عنيزه
صحت ابدانكم وحياكم الله ومشكورين على مروركم وتشجيعكم دافع لنا لتقديم المزيد..لكم خالص شكري |
| الساعة الآن 04:32 PM |
Powered by vBulletin V3.8.11. Copyright ©2000 - 2025, Tranz By
YsOrI
اصحاب عرب
الحقوق محفوظة لشعراء عنيزة 2004-2024