في يوم الجمعة شهر عشره حدتني =العبره اللي يوم واحد وعشرين
أبكي على بنتي بعد فارقتني =انا واهلها كل منا حزينين
البنت نوره ليت ما هيضتني =والامر لله والقدر منه راضين
كم نوّرت بيتي كما نورتني =والله ملهمها مثال الوفيين
في طاعة الله بالوفا معجبتني =بافعالها بالعطف واللطف والدين
مرضت مرض خافي ولا تعبتني =ولا تعبت بالكشف طب المداوين
مبنى الملك فيصل عليه ارهقتني =أسيابه اللي شفت فيها مصاخين
بالابره اللي بالصباح أزعجتني =في ظرف ساعه وقف القلب والعين
بعض الأمور اسبابها خافيتني =والعالم الله عالم الزين والشين
ميته فجيعه وش سببها فجتني =أعوذ بالله من حضور الشياطين
ماهي وساويس ولا داخلتني =والله يكشف خزي كل الغبيين
أدخل على الله ثم دوله حمتني =أنا وغيري في بلاد السلاطين
قاداتنا لو كان ازل ارشدتني =أهل العداله والنصف للمصيبين
يارب ترحم بنت ما نقدتني =بنتي شعر قلبي معي قولوا آمين
يا عل في الجنه بعد سابقتني =وحنا وراها لو بعد حين فانين
وطفيلها إبراهيم ذكرى شفتني =عساه يحيي ذكر ميّت وحيين
عزاي من ربي ولو حزنتني =مصايب الدنيا من الله راضين
عسى المزون اليا نشت بشّرتني =على مقابر مسلمين وسليمين
واعداد ما شفت البروق اجهرتني =على النبي صلوا معي ياالمصلين