شعراء عنيزة - غنّام .. قصه .. وقصيده

مسهم بالخير جميع

هذي قصيدة قد قالته لي جدتي الله يطول عمره عن أحد شعراء محافطة المذنب ( محافظة أ ) :D

إهنا واحدٍ والواحد الله في سماه

يقاله راجح السليمان من أهل المذنب ، مطوّع .. يعلم البزور ويحفظهم القرآن وعلوم الدين

المراد إن البدو هاك الحين على كلام جدتي ، يلفون على الحضر بالصيف عشان ترعى دوابهم وعشان يدورون الأماكن اللي به ماء

المراد ، ان البدو اللي لفوا عليهم كان شيخهم يقاله غنام ، وعنده بنت

مرةٍ من المرارير جا عن طريق الصدفه راجح ومعه خويّه .. وشافوا بنتٍ شيفه .. وحالته حاله .. و ( نخارير ) وحواق انا مالي دخل .. هذا كلام جدتي عاد ، الزبده سأل راجح خويه .. قال منهي ذي .. قال خويه : هذي بنت غنام

لعل غنام معجب براجح ... وقد قاله قبل ورا ماتاخذ بنتي .. وقاله راجح خل افكر .. مير عقب ماشاف البنت هوّن .. وقال معصي .. ما أبيّه .

مرت الأيام .. وجا خوي راجح وقال خلنا نروح نودع غنام .. يبي يشدون عن المذنب ... قال راجح .. ونعم الراي .. مشينا

راحوا .. يوم جو لمهم مالقوا غنام .. لقوا بنت شمحوطه .. قالت لهم تفضلوا .. قعدتهم بالمجلس .. وتشمر طوّل الله عماركم وتبدأ تحوف المعاميل .. وعلى قولة جدتي .. مير يخق راجح ويرف قليبه .. شاف هالزنود وهالصدر الفاز وهالردايف المنبوزه .. وضاعت علومه

سئل راجح البنت .. قال أنتي من أنتي .. قالت أنا بنت غنام !!

قال أجل منهي ذيك البنت الخبله .. قالت بنت من عرض هالبنات .. منب أعرفه

يوم غدت الدنيا سوداء بوجه راجح

وطقه أبو هاجوس

المهم ان البنت سنعتهم وقهوتهم إلين جا غنام

يوم جا غنام قاله راجح أبي بنتك

قال مالك لوا ... بس راحت عليك .. وراك تعييّ من اول .. علمه القصه ... قال فات الأوان عاد :(

عاد راجح كتب قصيده وقال :

غنّــام ليـتي مـاحضرت الشديـدا=ولا شفــت مــن علــّق بقلـبي سـطيا
الجــادل اللــّي لـون عنق الفريدا=مـا بــه مـن اللـي تكـره النفـس شيـا
عسـرٍ علــى القنـاص ما له يصيدا=لـو دارقــه مـع كـل حـيـدٍ ذريـــا
حــالي غــدت كنه نحيل الجريدا=اللـي طــواه اليبــس مــن عـقـب ريا
وغـديــت كنـي من مليك العبيدا=اللــي طلــب عـمـه يبــي العتـق عيـّا
الـزاد مــا ذوقـه ولا الماء البريدا=والنفـس مــن ضـيـم الليــالي طنـيــا
يـا مــازماً من دونـها راس حيدا=ومــن وادي مـربــع والآخــر سـنــيا
حــالـوا عليهـا دونها اخوان غيدا=أهــل سـربة تـبـدي والاخـــرى كـميا
لــو كــان لي حظ ورأيٍ سديدا=قبـلتـها مـير أقـشـر الــحـظ عيـــّا
غنــام يــا زبـن الحصان البليدا=يــا ريف أهــل هجــن سفـرهن خليا
الـوجــد لـو أنـه يجيب الوجيدا=تـجــيبه أسبــاب تـحطــه هـنـــيا
حــتى يطـيب الكيف ونحط عيدا=ونــوقـد بـجلحــوفـه وعـوج الـحـنيا

بعد هالقصيده ... ( ما ) وافق غنام ... وراجح على عهدة جدتي إنه قعد فتره يهوجس بالبنت همّن توفي رحمة الله عليه وكل مسلم :(

طبعاً القصيده هذي موجوده بموقع واحد بس ... ولكن مهيب صحيحه وناقصه .. وأنا أعرفه من جدتي ومن عمامي من زمان .. وواضح إنه رفض البنت قبل والدليل يوم قال : لو كان لي حظ ورايٍ سديدا ** قبلتها مير أقشر الحظ عيا .

ان شاء الله تجوز لكم :) وتجوز لخالي عطاشا أهم شي :D

عموما هي من القصائد اللي أحبه .. وخصوصاً البيت اللي يقول به : الزاد ماذوقه ولا الماء البريدا :(

اشوا اللي مالحق راجح على الصريخ .. ولا كان علوم :D

==

** نقطه ماله دخل بالموضوع :

رواية عن جدتي .. تقول إن الحريم مره جنّ للسبيّل الشاعر : قالوا وراك شايلٍ هموم الدنيا .. وسّع صدرك وإقصد بنا ... وكان هو تعبان مره ومريض وعلى آخر أيامه الظاهر .

فقال مطلعه :

ياناس أنا ويلي من الموت ويلاه ** ياكيف أبستانس وهو مقتفيني !

ياليت اللي يعرف عنه شي يفيدنا تكفون :)

والسلام عليكم ....