يقول وينك قلت انا طول الايام=والله تقل عيني تشاهد عيونك
قال انت وشلونك ونا قلت منظام=ماصار لوني بالغلا مثل لونك
انا جريح القلب مبطي من العام =وانت ابحياتك دالهٍ يذكرونك
خلّيت حقي منك شوفك بالاحلام=والله ماهذا جزى اللي يبونك
انا بدونك عيشتي ضيق واهيام =لاترخص اللي بالغلا يشترونك
لولاك ماحَفْيَت على الدرب الاقدام=مابي يحول البعد دوني ودونك
خلّيت غيرك من ورى وانت قدام=واقبلت لك راضي بكودك وهونك
جيتك ونا بين الحقايق والاوهام=ارجي عسى ظني يوافق ظنونك
منقاد قلبي لك من الشوق بخزام=ولهٍ عليك ويرتجي منك عونك
جعل النصيب اللي معك مابعد قام=ربي يقيمه لي وربي يصونك