عفى الله عن عين حلا النوم جافيها = كراها قليل وذارف الدمع محفيها
الى قلت الا يالعين هيدي وهوّدي = جرا دمعها الصافي وهلّت عباريها
تبيّن فروع الصبح ما ذاقت الكرى = ولا لوم عين فارقت شوف غاليها
ولا زلّ يوم او ليلة ما تعبّرت = عن النوح اعزيّها ولانيب قاويها
وانا في رجا جزل العطا علم بالخفا = يلطف بحال خافي الهم باريها
على نور عيني لب قلبي ومهجتي = تحنّ الضماير كل ما حلّ طاريها
حنين الخلوج اللي عن الضير فاختت = الى غاب عنها ساعة ما يباريها
وانا كيف ما ابكي طفلة غضة الصبا = حورية سبحان رب مسويها
نشت بالهدى والدين والحق والبها = فلو طالت الايام مانيب ناسيها
فيها طبوع كاملات حميده = حنون على الجيران ووصال عانيها
عفيفة نظيفة جيب ما داست الخطا = ولا هوجست بالمذهب اللي يزريّها
حشى ما بها من خافي العيب ذارب = حذا حشمة الوالد فهذا فهو فيها
كمل عمرها ثنتين مع عشر واربع = حذا محترمها تسفهه لو يحاكيها
خذت هجرة بالبيت عندي قليله = امانه وخذها الخيّر اللي عطانيها
ولانيب جزّاع فلا شك ولعة = اعرف الامانه ما لها غير واليها
فيا سامع دعواي في مظلم الدجا = تمحا جرايمها وتثبت حسانيها
وتجعل لها في جنة الخلد منزل = تقطف جنا جنّات طيبا وتجنيها
وتعيضها فيما قصر من شبابها = برضاك يا خلاّفها وانت واليها
الهي ودودي دعوتي تستجيبها = على النفس كله من غلاها نبدّيها
الا واتكدّر خاطري من فراقها = ولولا غلاها ما تكلّفت راثيها
سمية دموع المزن في غبة البحر = سوى البنك ما يدرك ثمنها ويشريها
وانا مابي الا يوم يطرى سميها = عفى الله عن عين حلا النوم جافيها
وصلوا على من لا افترى سيد الورى = عدد ما جرا من رايح المزن واديها