البارحه كن قلبي من ضميري يتلّ = كما يتل الوارد المردم السانيه
لاكن دمع النواظر بالخفا يوم هل ّ = هملول صيف به البرّاق غرقانيه
يحنّ قلبي من الفرقا حنين الهمل = والا خلوج على مقهور حيرانيه
على عشير صفا لي يوم عصر الجهل = هو منوة القلب من بدو وحضرانيه
ليته سقاني شراب مثل ذوب العسل = من ذبّل كنها طياح الامزانيه
اعلّ وابرد ضميري عقب شرب النهل = والنفس لابد لو طال المدى فانيه
ياهنّ ليت الدهر يمشي لنا بالعدل = حتى لمثلي ومثلك ينقضي شانيه
حمّلتني بالموده قيس حمل الجمل = محري اني اشيل فردة واخلي الثانيه
ميّل علي الحبيب وقال خلّ الزعل = يلزمك حمل الهوى من غير حقرانيه
قلت الله اقوى بهضتوني بحمل الوحل = والله يا لولاك ما انقل نقلة العانيه
قال انت حبك بقلبي راسي لم يزل = الا ان مشى ضلع سنجار لنجرانيه
واعرض يقاد الغزال اللي جفل واجتول = مغضي وهو لي يلدّ بنجل الاعيانيه
لاكن خنّة مجاديله نبات النفل = او عنبر مشتراه ابغال الاثمانيه
والا النواهد ازبيدي سقاه الهلل = يذكر وطاه امس عقب العصر ودّانيه
له قرّبوا فرخ جودي عليه ارتحل = طاريه عدّ عذي الما والاوطانيه
هو شدّ لاشك مدري وين جوّ نزل = قلت آه ثم آه يوم اقفن الاضعانيه
ليتي حضرته وقلت إلـ صاحبي بالمهل = ودي انودعك يا سحاب الاردانيه
الديرة اللي جفت غض النهد للمحل = لعل سيله عجاج ودمّ غربانيه
العارفه عارفه ينقض على اللي فتل = واللاش ما يعرف المعزا من الضانيه
اياك والخامل اللي ما يعرف المثل = تصير شكوى عليه الحال نقصانيه
احب طريا فرج وغزيّل بالسهل = مع در عرب تقطف نبت ريضانيه