الخير يختاره لنا عاليَ الشَّان=والشر بِظْرُوف الحياة امتحاني
من نعمةَ الاسلام بالهون وِحْسان=نمشي ونكسب باليقين الاِماني
للصبر ضيم وخاتِم الصبر برهان=ماحَلّ ضِيق الا الفرج له ضماني
يالله ثِبَات الدين في كل الاحيان=والآدمي عمره ولو طال فاني
يشهد له الجامع على طول الازمان=حتى الضِّلِيعه به عيانٍ بياني
واليوم فَاجَانا خبَر موت بِاِعْلان=عن فَقْد من يبكي عليه الزماني
قالوا رحل من زان وقته ولا زان=عبدالله العبدالعزيز السناني
أبو عزَيِّزْ فاكِهه كل ديوان=مابه مكان الا رثاه المكاني
نفسٍ غذاها الطّيب في غَرْس الايمان=ياما تمنّى وِخْذَلَتْه الأماني
بالمِسْهِرِيّه له محبِّين واخوان=مع الحيالَه جاذِبِته التهاني
عاصَر فُحول الشعر من رُوس الاعْيَان=واحْيا لنا شعر الحكيم الفلاني
تَذْكر عنيزه له مرابي وميدان=من فوق سَاف السِّلْسِلِه له مواني
سوالفٍ تحيِي شبابٍ وشيبان=مامات من سَطَّر لها بالمعاني
ان فاتنا زُول السناني بالابْدان=مافاتنا الرَّاوِي بحسْن البياني
شاعر وراوي له بالاشعار ميزان=لولاه في تالي زمانه يعَاني
الله يعيضه في ذَرَا ذات الافنان=عن جَفْوِةَ الدنيا بدار الجناني
الله كريم وعنده الخير بيبان=يكتب له الحسْنَى وعَشْر الحساني
قولوا معي آمين من قلب ولسان=والخير والإخلاص لاجْلِه دعاني
صلاة ربي ماحَوت غُرَّ الامزان=على نبيه مع سلامه مثاني