سـلام ياراعـي الموتـر العـودي=الله يسعـد ليـا ليـك وايـامـك
لا واهنـي سايقـك بالهنـا كلـه=لو كان درويش ما يفـرق الزينـي
لولاي أداري من النـاس منقـودي=لا حـكٌ رفرفـك وادقٌ صـدّامـك
واعرقل السير مانـي مـراعٍ لـه=واضرب بعرض الجدار القوانينـي
من شان اطالعك في داخل البـودي=اموت واشـوف برقعـك ولثامـك
يازايد القلـب علـه علـى علـه=يامـورد الخـد ياكاحـل العينـي
ذالي زمانيـن حـاوي ومـردودي=حتـى تحلّيـت لبسـك وهندامـك
ياجنتل الـذوق يـا باهـي الطلـه=مليت شـوف الغنـم والبعارينـي
اسـال رب السمـاوات معبـودي=يجعل لك الستـر خلفـك وقدامـك
واهني بالوقت من هو حليـل لـه=عـز الله إنـه غنـي الغنيّيـنـي
يشوف بالعيـن ويثنـي العـودي=ويشم ريـح النواويـر بأنسامـك
مانيـب حاسـده والله يمهّـل لـه=واللـي عطـاه يتكـرم ويعطينـي
مدري متى يستوي بك علي الجودي=ياقلب مركـب مناويـك واحلامـك
عذبتنـي كـل بـرقٍ تخايـل لـه=والقطر محبوس والناس مسنينـي
يكفيك مافات فالبيـض والسـودي=لا الهند هندك ولا الشام هو شامك
خلك بنجدك علـي صالـي الملـه=يشويك حـره وبـرده ويشوينـي
الورع للـورع والعـود للعـودي=كـل بلامـه وخلـك علـى لامـك
شمسك بروس الذوايـب ومنتلّـه=وش باقيٍ بعـد كملـت خمسينـي
شيبت والنقص بادٍ علـى الـزودي=وانـا اتحـرى مَحَنّتْـك وريامـك
خلك علي الدين خلك علـي الملـه=لا تحفي الرجـل خلـف المقفيني

اقتباس: المشاركة الأصلية كتبت بواسطة ابو سراج (المشاركة 49422) صح السانك ابو عبدالعزيز والله اني من محبي شعرك والله اني ادعي ربي انه يرزقني زي موهبتك والله ايوفقك

حبك مولاك يابعدي

ولا عليك زود

هذا بس من ذوقك ياذوق

اقتباس: المشاركة الأصلية كتبت بواسطة إنسان جريح (المشاركة 49438) ياليت اللون ما هوب عودي رائعة مثل كاتبها

نغير اللون ، لعيونك

يالغاااااااااااااااااالي

وش تبيه بس ؟

الرائع انت بمرورك الكريم ومداخلتك الجميله

لا عدمتك