بكيت بك يادار من ضيقة البال=أبتسلى مير ما في يدي حيل
ومصادم الضيقات بالصدر غربال=يفت حيل الرجل لو كان حلحيل
يا ويل من شاف الطنا عقب الاقبال=وضاقت بي الدنيا نهاري مع الليل
لا قام وقتي واعتدل شرب فنجال=اندارت أفلاكه سريع على الميل
لما غديت بمرقب الغي نزّال=لا فزعة ترجى وهو فزعته خيل
من قل ماله صار ماهوب رجال=لو هوصميم من خيار الرجاجيل
يهون قدره بالمجالس وإلى قال =يسفه ولا يوحى ولو صاح بالحيل
وإن كان في كفه سحوت من المال=يحشم ولو من هو عفون الزماميل
أشوف وأغضي واقهر النفس بحبال=وأغض ما بالصدر وبالصبر وآشيل
ومحمل نفسي حمل كم حمال=ومكلفه ومصخره كنه الفيل
واعلل النفس الشقية بالامال=واد جرى لا بد يجري من السيل
ولا نفع بالنفس توريد الأمثال=تقول دعني واترك القول والقيل
يا قلبي اللي صار للهم مدهال=كب الطنا ما تستخيل المخاييل
بوارق جنح الدجى تشعل إشعال=بلكي على راسك تهل الهماليل
قال التماني ما بها واحد طال=يبذر هبوب ويقبض الهم ولويل
وإن شفت من فود الدهر وزن مثقال=فالشر في تاليه هيل بلا كيل
كم بت ساهر سامر النجم واحتال=من ضيقة الخاطر ومن شوفي الميل
واصبحت مضروب على الكبد بخلال=ومن حرها شبت بجاشي مشاعيل
مضهود والمضهود ماهوب حمال=مثل البعير إلى انقطع بالجواديل
لو يضربونه ما تنهض ولا شال=وهم يحسبونه قوي على الشيل
حوادث الدنيا غيارات وأهواال=فيض وبعض الفيض غيظ وغرابيل
كم حدرت من روس قوم ودركال=وادعت على ملكه تنوح البلابيل
سجّمت أراعيللنصر زايلٍ زال=شوقٍ بعيد وحال دونه غراميل
خدٍّ بعيدٍ زاميٍ دونه اللال=لا تاصله رجلي ولا آثق مراسل
أقفى ومشيه ينهب الخد زرفال=ريلٍ سها وإن لجلجن المحاحيل
وأنا أتخشّع بالمشي من ورا الأجمال=آقف إلى جيت الوعر ما معي حيل
وعنزت بالشكوى إلى واحد عال=عالم دبيب النمل في مظلم الليل
إما حياة تبهج النفس واقبال=وسود الليالي نور عزه قنادبل
وإلا فلا ينعاف قصاف الآجال=رحمة جزيل المد خير التحاصيل
من بحر جودك يالطيف بالاحوال=يا منجي ذالنون ومهلك هل الفيل
صفح جميل ختمها خير الاعمال=وفي زمرة الأبرار يوم التنافيل
يوم به المخلوق تشخص بالاهوال=والشمس عن روس الخلايق تجي ميل
بعده صلاة للنبي عد ما زال=من جملة المخلوق جيل بعد جيل
وما انحدر نجم على الغرب حوال=من مضنك القطب الشمالي إلى سهيل
أو ما اعتلى صوت الملبي بالاميال=على نبي فصل الحق تفصيل