اشرف الفعل وازكاه ردّ السلام = والتحيه على الحاضرين الكرام
عدّ ما هلّ وامطر حقوق السحاب = او عدد من يصلي خلاف الامام
او عدد ما يهبّ الهوا كل يوم = او عدد ما صدر من حلال وحرام
من سليم الجوارح نظيف الفواد = مسلم مثل ما قال راعي نعام
شايمٍ منعمٍ ناصحٍ للرفيق = لابس فاصخ ثوب صعب المرام
شايف عايف مستعز ذليل = عقب حسن المطالب وشرب الغرام
قانص مفلس لو رمى ما يصيد = عقب ذبح الجوازي وذبح النعام
قانع من كثير بشي يسير = معذر بالفوايد وجمع الحطام
صابر خابر ما مضى ما يعيد = في سنين مضت مثل رسم الحلام
ذاك وقت مضى مثل رجع بعيد = سابح بينهن في بحور الظلام
تاعب لاعب في ظهور البرور= شاكي باكي لو بكا ما يلام
تايب غايب عن فروح السرور= شارب الغبن صابر لكاس الحمام
صادر مجزل حايم للشراب = من غدير مشارع لبير الهيام
قاطع ساقة الورد طاوٍ رشاي = مهزل مجزل معجل بانهزام
حازب عازب من قريب بعيد = شارد طارد وارد بالحيام
صاحب للمجالس ورقا الرجوم = حارب للطرابه وحلو المنام
غافل جافل حاسب للنجوم = مفطر صايم عن لذيذ الطعام
فاهم كل ما تحتويه الرجال = عارف جاهل معجم للكلام
مصحب للمساري وقطع الفجوج = شاقيٍ مستريحٍ رثيث العظام
اعتذر من زماني الى ما لقيت = من يشاكيني الحال شرق وشام
بالرخا واجد الربع كثر الجراد = بالمجالس وعند اكتراب الحزام
مثل من صاح بالمقبره = يوم شاف النصايل يقول الهمام
والشجر زيلة الطلح تجذب عليه = والظما في حدوده وزينه يضام
او كما اللي يصوت بقصر خراب = ما به الا الصدى والردا والهدام
مثل من فات عمره ابحر السموم = كل يوم بيوم وكل عام بعام
افتهم يا موّصى على من وراه = عن سباع المجالس وكبر الجهام
والردا والردي لا تحطه رفيق = مثل من نايم فوق بير هدام
مخطر انك الى نمت فوقه تطيح = وانت ويّاه في جم بير ليام
غرّني في زماني وانا ما دريت = من ضحك لي بسن الغزال الريام
قايم في لزومه وهو مستريح = عندي أكبر بجيله من ام الحمام
واستدارت هوا الوقت منه وعليه = وانكرن يوم جاله ثروب وسنام
مثل ثور جهل في غذاه الشريف = يحسب انه يخيّل نهار الزحام
يوم شدّ المعارق ومسّ البطان = من رداه انسدح والشريف استقام
واحتذر عن ردي الربا والرضاع = واعرف ان المخاول تغلب العمام
والبريره على حلّها ما تضيع = واطيب البر ما كان قبل الفطام
واحذر الواش واللي يعبد الوجيه = لو لقيته يصلي بركن المقام
مخطر انه يبي غفلة من وكيل = ويسرق الكتب والا يقص الحرام
والعدو احذره واصحبه من بعيد = لو ضحك لك فهو مسرج للولام
لا تحسب انك الى احتجتهم ينفعون = عند حلّ القدر ينهبون الخيام
واحتذر جيرة النمل والما الهماج = والمجاحر ومجمح دميم العظام
ماقع للحوايم وهزل الوحوش = والمجاحر مربّ السباع الهوام
واصحب اللي صحيب لجدّك وابوك = واستخصّه بشورك ولابه ملام
ذا ويا منتهى السدّ يا مشتكاي = استشيرك بعد حشمة واحترام
من سميّه الى صرت شفق عليه = ميّة واثنتين وعشر تمام
واستعينك الى حل مني قصور = جعلك الله على العز دوم الدوام
ذا وصلوا على سيّد المرسلين = عدّ من طاف واحرم بركن المقام
مثل ما قلت باول فهذي ختام = اشرف الفعل وازكاه ردّ السلام