يا معتلين اكوار نسّاع الازوار = ست بست فوقها اربع وعشرين
بتر الفخوذ اخفافهن قطم وصغار = فج النحور افحاز دغم العرانين
حيل مواحيل من القفل ضمّار = عقب العساف معفيات زمانين
لا مازهن لبس الكلايف والاكوار = منوة غريب ضايمه ضايم البين
هجن دواليب الفيافي لهن كار = بعد القريب وقرب دار البعيدين
لا روّحن مع عبلة ما بها اشجار = مثل القطا صاعه ربيب الشياهين
لا انساق من سوّاقة الفجر مظهار = الى ان اهلن بالعدد مستعدين
يمشن من دار على سيف الابحار = دار بها لذّه واهلها بالعدد مستعدين
والظهر وردن الحفر عذب الابيار = هابن وذيّرهن سواد المقاطين
وراضوا ورووا وانتووا عقب مصدار = وعجلوا وهم من قبل ما هم بعجلين
خذوا لهم مع ماقف الريع معبار = وحطوا شرا الباطن من المتن ويمين
وحزّة غروب الشمس شبّوا لهم نار = بالحنبلي عشوا وهم مستريحين
وشالوا خفيف قشارهم وقت الاسحار = وركبوا وخلوهن مع الحزم قسمين
وتواجهوا في حنية نبتها اقفار = ما به حذا صيد الخلا والسراحين
يوم استدار الفيّ والكيف مندار = ركبوا ودلّوا يرفعون البياشين
متبجحين بشوف دار بعد دار = وحيذ بعد حيّ .....................
تشاوروا والكل مكتوم الاسرار = بمراحهم والشوار من بين الاثنين
توايقوا بين الصناقر والاقوار = على بلاد بين خضر البساتين
صكّت حواميها على نار واكتار = وولاد وعيال تفك المخيفين
اولاد علي اللي علمهم بالامصار = عقّال بالمجلس بالكون طفقين
ربعي هل العادات كان الدخن ثار = مع دربهم يشبع خفيف الجناحين
يتلون ابو خالد حجا الضيف والجار = سور البيوت اللي حرسها مغيبين
من سلّة الغلبا هل الكيف والكار = بالمد جزلين وبالكون وافين
ماهوب تمجيد يصوّر ولا صار = حامينها دنيا وحامينها دين
ربع الى افتلّت لواليب الاقدار = وتنزّحوا هرّاجة الوجه مقفين
نطاّحة الماجوب وافين الاشبار = رفيقهم يفلح على العسر واللين
وان قابلوا جمع المعادي لهم ثار = تكتب وقايعهم تواريخ وسنين
سلّم عليهم عد همّال الامطار = وعداد ما يجر القلم بالفرامين
سلام احلى من لبن عرب ابكار = بالخايع البدري من اللام والسين
لا روّحن من وادي فيه نوار = ترزم على المقهور بين العشاوين
فان سايلوكم لا توانوا بالاخبار = حمض الرجال اللي على العلم شفقين
الصبر ما به للفتى كسر تعبار = لما يهب اله الهوى عقب تسكين
وقل للربيعي ما على الطيب تحيار = من طال حبله شرب والناس مظمين
يا عابد الرحمن يا خير الاخيار = بي علّة ماله طبيب يداوين
دوّر دواها بين صاير وما صار = جزم بحزم وخل عنك التاثمين
والشك مرفوع عن الكل ومجار = واسلم وسلم لي على المستفيدين
اهل المجالس والمدارس والاخيار = في ساعة عنهم حسدهم مغيبين
تمت وصلى الله على سيد الابرار = ما شيّعوه وصدقوا له مطيعين
او مازها نبت الكلا غبّ الامطار = او ما نهض بالريش ضرف الجناحين
والآل والاصحاب مع كل الانصار = والتابعين ومن تبعهم الى حين