عفى الله عن عينِ وجعها يعودها = كثيرٍ مراعاها قليلٍ صدودها
الى بغت تدله نهار تذكّرت = زمان تريده من ليالي سعودها
سهرها مداومها على اللين والقسا = كما داوم الضاحي مذاري نفودها
الى هجعت من تالي الليل ساعة = شهر من دهرها حرّق الما خدودها
وقلب صبور مثل ما يصبر الصفا = على ما يصيبه من صواعق رعودها
وكبد على فاقاتها تشرب الطنا = من الكره لين انه برا الهم عودها
وحال كلت واكلت وكالت وكيلت = من الغبن لين الغبن بعث لهودها
كنيّتها في وقت انا مستهينها = واليوم هاشني وباحت سدودها
على شوفتي دنيا تدانت وقرّبت = فروخ الحباري واستذلت فهودهاا
زهوف لهوف مستعز ذليلها = شباع حصانيها جياع اسودها
وانا يوم اقوله مستريب من امرها = اشوف الليالي مفهقات فرودها
الى صار هذا ودّها من يردها = غتور بيور كيدها ما يكودها
اغارت وغرّت بالتزخرف وغيرت = مشاريبها والنقص يرجح بزودها
كم فرّقت من شمل راعي موده = وبكت عين حي من مفارق ودودها
ومن داله في نعمة ما تدوم له = وكم دولة زالت و ولت جنوده
كافي كفا الدنيا الى عاد مابها = شفنا خباريها حيام ورودها
انا يوم اقوله شايف لي مواري = اشوف العرب قامت تحامي بدودها
وانا بدّتي لاشفتها عفت مابها = كما الخيمه اللي زلّ عنها عمودها
وعود بلا غصن قليل به الذرى = كما السرحه اللي ظلها من فنودها
وانا ودي اصبر واطرد الهم بالنجم = ولا تمتنع كف بليا عضودها
تصبّرت احسب الصبر يدني من الهوى = ولا صبرها من غبنها الا يزودها
ابي لي ولد عم من دنيتي = عني شلاهيب الليالي يذودها
رفيق شفيق تطرد الهم هدته = الى صاحت العطفه ودرهم قعودها
الى ابعد المجرم وصادت حبايله = فانا والليالي جايبات جهودها
ابي الجد وابن الخال والعم والنسب = اسامي جدود شيّعتها لحودها
كما العطبه اللي شرّها من شراره = بقى من لهايبها ذليل خمودها
الى قلّ ما بالكف لو كان داهيه = تنزّحت شيماتها مع وجودها
فلا بد راعي منوة يدرك المنى = ولا بد من هوجس بدار يروده
الا يا نصيحي خل نصحك وخلّني = يكفيك تفريق السنين معدودها
الى عشت فيها جاهل كنت عالم = والايام تبطش والليالي شهودها
ابي لي شجاع التجي في معزّته = كما تلتجي عقبانها في حيودها
عزيز رفيع الجاه عزّه يعزني = والاخبار تذكر من ثناها وجودها
صبي الشقا ورث الصخا شايع النبا = امصالي لقالاتٍ قليل ركودها
قريب من الحسنى بعيد عن الدنس = جميع المكارم بذل كفّه يقودها
هو الليث بن عبدالعزيز بن زامل = هو مقدم السربه وحامي بنودها
ابو كلمة وان قالها ما تغيرت = حشا لو تغيّر جمّها في عدودها
تورّث مواريث الصخا من منابته = كما بقشة الريحان تجني عقودها
اهل ديرة المظلوم عن كل ظالم = ومن ضدتّه دنياه يرقى سنودها
هم رغبة الفيحا وهم باب سورها = وهم نورها الصافي ذراها برودها
ذراها عن البرد المسمى الى اصطفق = وعن القيظ لا شبّت ليالي وقودها
حموها بنقض وفتل ما كاد يوصف = بمصقّلات مرهفات حدودها
حموها من الخرمه الى ساق للجوا = وما فرّعت برمه الى اقصى نفودها
ولا حايلوها من صديق عطيّه = ولا من بخيل مقتفيها جحودها
سوى الضرب بالهندي على الوجه والقفى = الى استكملت ملس المعارق شنودها
حموها وعفوها على الطيب والنقا = لين ابعد المجرم وغمص حسودها
يجازون بذّال الجمايل بمدته = وراعي الخطيه يستلمها بزودها
والى تمناها عدو وهامها = تموت الحيايا وسمها في كبودها
الى التطم حمّايها راس راسها = ابو خالد المشهور مقدم اسودها
هو مشعل الظلما وهو كوكب السما = وهو هدّته من ذاقها ما يعودها
عدى واعتدى في ليلة لا ضوى لها = وحرّم على عين المعادي رقودها
حدر راي من سادت له الترك والعجم = والانصار سادت له واراذل يهودها
ابو تركي المشهور في كل ديره = تخضع له ارقاب البوش مع هنودها
تمت وصلى الله على سيد الملا = ما ذعذعت واهمل وما اهتز عودها
عد النبات وعد ما قيل باوله = عفا الله عن عين وجعها يعودها