إلى أبصرت بالدنيا تكدّر لي الصافي=تعذّر زماني ما حصل صاحبٍ صافي
أفيّض عليه أسرار ما التجّ بالحشا=وكل شعيبٍ له مفيضٍ إلى طافي
ومن عاش ما له في زمانه منادم=تجرهم عمى رايه على جرف ميهافي
تخيّر من أجناسك رفيقٍ تودّه=وثيقٍ غميق الفهم للعلم عرّافي
يتحمل زلاتك ويبصرك ما خفى=للقلب دربيلٍ للابعاد كشّافي
وراغم على الخل القديم ولو سها=واصرم إلى بان الجفا لك والاجنافي
وترى ذهاب الذهن عشرتك لاحمق=يجوّز طغى جهله على حلمك الوافي
وترى عذل من لا يرعوي لك جهاله=كما وصف من ينفخ بكيرٍ وهو طافي
ومن اغتنى بارياه عن شور ناصح=تندّم ويِكشف لع إلى شلف ما عافي
ومن خاطب الجاهل فهو مثل من كشف=وجهه وقابل شعف عاصوف الأصيافي
ومن لبْس تاج الكبر ما صان عرضه=ولو ممطرٍ جوده على الخلق هتّافي
ومن شال حمل الزوم كاد امتحانه=ولا حمّل الله عاجزٍ حمل الإسرافي
ومن طاول أطول منه ما استرّ ساعة=يجاهد جنودٍ ينقسم رايها أنصافي
وتكلّفك بامرٍ ما عناك عذاله=وتبرّيك عما كان يلزمك له قافي
ولا تسلك إلا مسلك الدين والتقى=ولا تنزل إلا في علا روس الأشرافي
ولا تصافي كود حيدٍ سميع=غيورٍ على الصاحب نصوحٍ وميلافي
ولا تلوم النفس في جاري القضا=ما لك عن المقسوم يالعبد من لافي
وباشر هل المعروف منك بتواضع=وهل الشر بادرهم بشرٍّ وتستافي
ترى اللئيم إن لان له منك جانب=توطّاك ويوري إنه يخيف ويخافي
فالعوشزة لو هي على النيل ما أثمرت=بوردٍ ويقوى الشوك والغصن غريافي
وكم جاهلٍ صوّل على غيره القضا=ويجرّم بفعله مسلمٍ غافالٍ غافي
وكم بخيلٍ فرّش الخلق ماله=وهو منه محرومٍ على نفسه اتلافي
كوصف إبرة عريانةٍ دبّ دهرها=وهي تكسي المخلوق من قمش الأصنافي
فالمال له حقٍّ حلاته مع الفتى=يضرب به المجرم ويبذله للصافي
فمشيي على حدّ الصراط متحسّر=لما آقف بقعرٍ في لظى ما له أطرافي
ولا أقصد لئيم طالبٍ منه حاجة=لو هي بكفه حال دونه جبل قافي
وترى الطبع ضلعٍ ما يزول ولو نزل=زحل في منزل المرّيخ ما افترّ بعسافي
وجلوسك مع الفهم مما يفيدك=ومع البهم يطبع ران قلبك عمىً خافي
ولا تبدي أسرارك لمن لا يسرك=ترى أكثر نصاحك يريدون الإشرافي
ولا توري الرقة إلى اوزمك همة=تِرجف به الصافي وتِفرح به الجافي
فصحيب العيا والعجز ما أدرك مرامه=يفوته وهو يذري على راسه السافي
ولا تِتّبع راي السفيه من الملا=غضوبٍ على أدنى الدون للخل نكّافي
ومن عاش يزرع بالتماني رياضه=يحصد الهوا ويوافي الغبن يستافي
ودمار العمار بدار ذلٍّ مقامك=ولو تربة أرضه تِنبت اللولو الصافي
وبالعز لو في راس حزم ترومه=لكنك في جنّاتها مرغدِ غافي
ومن شاف بالدنيا قبول كمت له=بْخيلٍ مغاويرٍ وهجن له أردافي
ومن رامها عشقان واغري بحبها=فسوفْ يرى منها تناكير وعيافي
ولا تكترب لامرٍ تقدم همومه=ترى صعب الأشيا ما اعترض لك بالأصدافي
فالى اشتدّ حبل وسار سوٍّ ترى الفرج=قريبٍ بـ(ألم نشرح) دليلٍ وهو كافي
فبين افترار الصبح والليل كم حدث=يسرٍ بعد عسرٍ والأيام زلافي
وابرم دواليبك بالأسباب ربما=تِوافق مفتاحٍ للأقفال ويكافي
فمن راس صعبات المشاكل برايه=أدرك به أشيا ما ينوله بالأسيافي
بعزمٍ فراي العزم كم فك مشكل=ونجّم فلا تدري الشهر وافي او هافي
وتزمّل عقول أهل التجاريب واجتنب=بالأريا عمى رايٍ مع الخوف رجّافي
وأنا عن معاني كل ما قلت عاجز=سراجٍ لغيري محرقٍ نفسي أنصافي
ركنت نفسي للهوى يوم لي به=مرامٍ وشفّي فيه مياس الأعطافي
خدمت القلم والطرس للشوق مصخر=بعساف شرفات القوافي على القافي
فإلى جزَت نفس الغريم من الهوى=فلا ينفع المسنين تذكير الأريافي
سنينٍ توالت يوم لي بالهوى هوى=حربت الكرى ما أذكر بها ساعةٍ غافي
وصدّرت ولا يغنى الفتى ذكر ما مضى=لا عاد عن طلب الهوى معطيٍ قافي
كذا البدر يطغى في بروجه إلى انتهى=ويكسف ويِصحي صافيٍ يوم الأنصافي
سلامي وتسليمي على شافع الورى=دعا الملك القدّوس والروس كِشّافي