قال يمدح طلال العبدالله الرشيد أمير حائل بمناسبة انتصاره في غزو الجوف سنة 1281هـ :

طلال لو قلبك حجر أو حديدي=أمداه من حامي وطيس الوغى ذاب
شبّيت في نجد بنار الوقيدي=واحرقت فيه عداك واذريت الأصحاب
وكسيت ملكك ثوب عزٍّ جديدي=وسلّيت حال عداك ياعز الأقراب
بحربٍ وضربٍ شاب منه الوليدي=مالوم من عاداك يومٍ ولا شاب
تلقى الخطوب بباس ليثٍ شديدي=وعزايمٍ عزّت على عمرو وشهاب
أحيت شجاعة خالد بن الوليدي=وأنسيت قالاتٍ لأبازيد وذياب
لو كان عمرو بن معد الزبيدي=حيٍّ لجا بحماك يا زاكي الأنساب!
حيثك وفيٍّ بالوعد والوعيدي=غيثٍ وليثٍ حضرميٍّ وقلاب
صميدعٍ عنتيت عيٍّ عنيدي=شهمٍ وفيٍّ هيلعيٍّ ووهّاب
شفقٍ على الداني حليمٍ رشيدي=طفقٍ على الجاني جريٍّ وحرّاب
روّح لابن شعلان علمٍ وكيدي=إنه بشهر الصوم ضيفٍ لحطاب
وأوفى لهم وافي الذمام الوعيدي=وعنى لهم في خمسة آلف قرّاب
سردٍ وحردٍ كالدبى يوم قيدي=وأتعب طويلات الجلامد على الداب
واقفوا عنه خرّام سك أويدي=وتبدلوا عن دارهم دار الأجناب
خيّم على (مارد) ورد الرديدي=وتم الجواب وعزّب الجيش معزاب
ضرَب وخرّب كل قصرٍ مشيدي=كن الصواعق والرعد حسّ الأطواب
دمّر وجمّر ناعمات الجرديدي=وأهفى مقام القوم والنوم له طاب
بفجريّة كنه ضحى يوم عيدي=بدريّة ويعَز به من بالأصلاب!
وهو على اللي مثل عنق الفريدي=أو قارحٍ مثل الفهد يوثب وثاب
يقلط على الجمع المشهّر وحيدي=كالموت لأرواح الملابيس نهّاب
يدوسهم دوس البغال الحصيدي=عسى عليه من الولي عز وحجاب
أنساهم الماضي بفعلٍ جديدي=وأودع مصاعيب يقادون بكتاب
صاروا له الحكام مثل العبيدي=وأسقى سراج العز من دم الأرقاب!
بالغت في مدحه ولا صح بيدي=ولا أحصي خصالْ أعجزت كل حسّاب
يقصر عنه فهمي وينفد نشيدي=ومن الثنا لي خاطرٍ ما بعد طاب
ياولاد عمه كاسبين الحميدي=شمّر ينابيع الصخا حصن الأطلاب
يا ما هفا يأيمانهم من عقيدي=ولا جنّبوا عن قالةٍ خوف طلاب
قوم إلى ركبوا على حرد الإيدي=شفت القلايع كالحراذين هِرّاب
وصلوا على الشافع بيوم الوعيدي=محمد المختار وآله والأصحاب