طرى الطاري وقزتني شطوني = شهر وايام ما نامت عيوني
عطف فكري لتوليف المعاني = وانا جايز وما قدر يكوني
رجعت لعصري الاول مولف = احرف بالمعاني واتصرف
وانا ماني على هذا مكلف = كفى الله شر ما ترمي ظنوني
رمى ظني عفا الله عن ذنبي = قبل ماقول عن ما شفت وانبي
عن اللي مكن الطعنه بجنبي = عسى ما كاد من طعنه يهوني
غريب ما شي مانيب اعرفه = ولا لي مع مثل هذاك صرفه
وبعض الناس يبلي الناس ولفه = وانا لولاه ما هاضت فنوني
ولكن سامحوني يا جماعه = ابسرح مع طريق الغي ساعه
عسى قلبي يخفف من صراعه = ولا تقضي على عمري غبوني
قبل ما يلحقن ضر بروحي = ابا عالج من امثالي جروحي
ولا ابغي نابي الارداف يوحي = عن اللي صابني من عارضوني
عسى يسمع ويرحمني ياليته = يجيني او يعرفني ببيته
اكود الهم من اجله نسيته = ولا اذكر حاجز دونه ودوني
ابنسى الهم والغم بغرامه = وباطبق نظامي مع نظامه
والى هذا تحقق بالسلامه = فانا عقب السهر ترقد عيوني
متى يا سلوتي قل لي وانا اصبر = والا قل لي الحيله ودبر
وانا والله عن وصلك فلا اخبر = ولا ادعي موشي الفتنه ينوني
متى بالله تسعدني بشوفك = وحقق ما تخفى من وصوفك
تنعم لا تلقيني كتوفك = وتبقيني على الدرب محزوني
كفايه لا تعذبني زياده = وتسفه طلبتي من دون افاده
ابي لي عندكم يا زين عاده = بدفتر مكتب العشق اكتبوني
عليك الله قل لي ويش ودك = ولا تخفي على مكنون سدك
الا بعارضٍ عني يردك = يقوم الله في عونك وعوني
ابصبر عشرة ايام او اكثر = لمنـّك من عواريضك تدبر
عسى يا متلف العشاق تقدر = ويرجع قلبك القاسي حنوني
مضى هذا وقلبي من حنانه = هرج عما طرى له في لسانه
تواضع وانقذن والسد امانه = وعهد الله ما للسد اخوني
صلاة الله على المختار سيدي = محمد ما لعى فوق الجريدي
حمام الورق او ما فات ساعه = وما هلت مواخير المزوني