توارد بنات افكار فكري علي بالي=ولا اميٌز اولها ولا اميٌز التالي

ولا ادري معين ابدا ولا وين ابنتهي=الى جيت اببدا مبتدا القاف يبدالي

اخاف اتهاون ويترادى مشدٌها=وانا احرص عليها مثل حرصي على حالي

توارى الحروف ومفرداته من الخجل=اذا قمت اخاطب كوكبٍ بالسماء عالي

وحاولت الم لم ما شرد من خواطري=واروضه ترويض الصٌعب صوط وعقالي

وارفع معانيها على مستوى الحدث=واصوغه بقالب حب لاميرنا الغالي

هذي عنيزه في قدومك تراقصت=علي انغام حب اللي له المدح ينقالي

هلا مرحبا يابن الفهد والف مرحبا=عدد ما يمرن الليالي والاجيالي

هلا مرحبا من قلب ما هي مجامله=اقوله محبه لك وتقدير واجلاالي

هلا مرحبا ترحيبٍ احلى من العسل=والطف من النسناس واغلى من المالي

هلا مرحبا باللي ترعرع على الهدى=امبدٌي الطاعه على كل الاعمالي

هلا مرحبا باللي على راس منبته=امعرٌب الجدين والعم والخالي

هلا مرحبا باللي يمينه مصلطه=على المال صلطة خير .لا صلطة اهبالي

كم امحكومٍ مابقى الاٌينفذ=حكمه وفكيته بلى منٌ واذلاالي

وكمٍ يتيمٍ سدٌت الحلق عبرته=ومسحت راسه لين عنه الفزع زالي

وكمٍ مريضٍ منهكٍ جسمه المرض=وصرت السبب باشفاه والشٌافي الوالي

وكم معدمٍ فكيت عسره وكربته=الله يفكك من عسيرات الاهوالي

وكمٍ وكم وكم ما احصي عدادها= لو اكتب سجلاٌتٍ عريضات واطوالي

ما ترجي الا وجه ربك ورحمته=عساها حجابٍ لك عن النار واضلالي

وعسى الله يطول عمر شيخٍ تسلسلت=نطفتك منه وصرت هالليله اقبالي

ابو فيصل الغالي ابوك ومليكنا=آمين يامنزل تبارك والانفالي

تملٌك عواطفنا ويسكن قلوبنا=ما حط له في كل ميدان تمثالي

تفرٌغ لخدمة مهبط الوحي وانثنى =دون المدينه واحتمى الحد والجالي

نجدد له البعه ونعلن له الولاء=ونرفع له البيضاء على كل ما طالي

هذي تماثيلي وهذي مشاعري=والمعذره عن قاصرٍ ما تهيالي

وحلاة الكلام يرد تاليه لاوله= توارد بنات افكار فكري على بالي

***

الله من همٍ وهمٍ بصدري=متضخمٍ لولا المحاني منيعه

ياليتني ما رحت وارخصت قدري= وذليت نفسي بعد ماهي رفيعه

انا احسبني عند ربعي ولاادري=ان السراب يغر عيني لميعه

وانا صقر يامير مانيب كدري=مرباي في روس الرجوم الرفيعه

يابو عمر ياميرنا الوضع مزري=تلعبنا الجهٌال مكر وخديعه

ماهوب ضني فيك ياذخر زهري= ترضى علينا المهزله والهزيعه

( ابريه) نصبتوه للشعر خبري=(وابريه) ماله بالمعاني وزيعه

بدري عليه العرف والنقد بدري=الشعر ماله فيه باعٍ ضليعه

امنين جاه الشعر الا ليت شعري=لو ان للشعار قاضي شريعه

ان عودت للشعر لاخيط وافري=واسد حلق اللي بحلقه بليعه

الى قصد سبحن سباحين خكري=مثل العجوز اللي تدله رضيعه

والى قصدت انظم بيانٍ وسحري=آسم وتاتين المعاني امطيعه

الشعر يسري في دمانا ويجري=مجرى العروق الضٌيقه والوسيعه

واغبن حالي منه واطول هجري= واكبدي اللي من طناها وجيعه

اما انتصف يامير والا انقل ازري=حكمك مطاع وحكم غيرك ماطيعه