يا راحتي جيتك ، يمينك مدها=خذ غايتي واما صفت لك ردها

جيتك ، وقلبي بالحسايف منتلي=والروح بفراقك حشى ما ودها

بي ضيقة ً عيت تفارق خاطري=حاولت اداريه وانا ما قدها

لكن جروحك بالضماير بيّنت=لين اتلفت روحً بقى لك ودها

محتاج أهيّض لك ، واريدك تستمع=دام الموده ما تبخّـر عدها

القيظ يلهبني وانا في غربتي=غادي عن امالً براسي ندها

إن شفتها بالشرق عني غرّبت=والى نصيت الغرب جاني ضدها

ما غير ادوّج والعزايم قصّرت=الكود حاصرها وضيّع جدها

تدري عن ايامً تمادت بالنكد=دايم تلددني وانا ما لدها

واليوم تهزعني وانا لك مرتجي=إليا ارتخت في الحبال اتشدها

وش بك جرحت الود يا كل الغلا ؟؟=وش بك تلوم النفس وانت تحدها ؟؟

ما قلت لك: خل الصراحه سلمنا ؟؟=ما قلت لك: سود النوايا صدها ؟؟

هذي جروح العام عادت وانزفت=وذي جروح اليوم بيدك عدها

كودك تداويها على قد الجهد=حيثك تميّز هونها من شدها

كلك نظر .. قل لي بحالي وش ترى ؟؟=وان كان زهبّت المطايا شدها

خذ ما تبي مني وعطني مطلبي=والفايته تكفى .. دخيلك هدها