أنا البارح حوس ودوس=بين الربابة والقوس
عيّت ترد الربابة=وأثر سبيبه ملموس
وين أبلقى جاونيّة=أشريها واسوق فلوس
ما بالقلب أظهره الساني=هرجٍ مخفيٍّ مدسوس
من عقبه ضاعن أفكاري=بين الرايس والمريوس
لكني همّيت بهمّه=أبزرع وأسني واروس
أي المزرع والربابه=وش جاب قليقس للقوس
الربابه فيها اناسه=ساعه ويجيك الكابوس
ما فيها خير ولا خيره=كنك من فقدَه محبوس
والمزارع فيها العيشة=زرع وبطيخٍ وغروس
ومواشي تسرح وتروح=كنك بجنان الفردوس
وزروعٍ تِحصد وتكدّس=شفها بالجرين كدوس
لو كانت هالدنيا خيبه=شوفتها برق الطاووس
وكلٍّ له رايٍ يمشي به=والراي الصايب مدروس
شب النار وحط الدلة=وبريّقنا أبو دنّوس
فنجال القهوة والشاهي=بحله يجلى الهاجوس
حيثنّ الدنيا لوّافة=يصبح فارسها مفروس
أخاف تخليني باكر=أنقش ظفري بالدبوس
همّن نرجع للربابه=مثل المبدا حوس ودوس