فِكْرِنا الشعبي مِنَ الابْداع خاوي=في مرابع نجد عطشان امجيِعي
باللسان احْصَان لكن قلب ذاوي=أمسياتٍ خَلِّفت شيخٍ صريعي
الزمن هو خصمهم مابه شكاوي=وان بغوا مهله جديده مايطيعي
في مجال الشعر قصدي لاتراوي=مايعَزِّينا فضا الفكر الوسيعي
مايفيد الصوت والشعر امْتِهاوي=عقب ماهو في ذرا المجد الرفيعي
في زمانه منتدَى عصر القهاوي=يِحْتِكم في ساحة القصر المنيعي
الولد من شِبِّتِه شاعر وغاوي=يِنْغَذِى بالشعر يوم انه رضيعي
كل شاعر عندنا مثل النِّداوي=من لسانه سِمْعِة الديرة تذيعي
وانتهى الاحساس من قلب الهواوي=قيمته من شاعر الغفله تضيعي
صار فيه الهَزْل والجزل امْتِسَاوي=والحداثه مطلب الموت السريعي
أشهد انِّه من كبيرات البلاوي=مثل علة عصرنا الحاضر تشيعي
ان شكينا حسرة ماله مداوي=وقتنا ماهوب سَمَّاعٍ امْطِيعي
راح فن الشعر في عصر الخلاوي=وبُوماجد وانتهى جيل الربيعي
وابن بادي وبُو سامي فيه حاوي=وابن سلمان اوحمد فَنِّه بديعي
وارْتَحَل عَلْيَ القَرِي والوقت طاوي=وابْتَدَا السّكَّر مع الضغط الفضيعي
والمنابر كلها بِيد الرَّهاوي=مابقاله لاصديق ولا شفيعي
يلبسون الشعر والبِشت الحساوي=والحصيله كلها مثل الضِّريعي
شعرنا الشعبي هَلَك والجو عاوي=كَفَّنُوه بْسُوق ماتشرى تبيعي
أكثر الموجود من وراد عراوي=من يعيد الشعر للشكل الطبيعي