ياحضره الايام شِدِّي وابْرِقي ثم ارعِدي=ماعاد لك نفسٍ خفيفه بالسنين الجافيه
والا عطِيني رايِتِك وارْمِي مقادِك واهجِدي=هاتي لي ايدِك في سلام الوقت وانتي وافيه
بين الرجا والياس مامَيَّزت نجمِي واسْعَدِي=تافِي مشاويرٍ قليله والكثيره هافيه
الوقت ضَيَّق ساحتي في باب جِدِّي واجْهَدِي=القلب يِبْرِم نِيتِّه والرجل دُونه حافيه
مَدْرِي نِعيب الوقت والا حظِّيَ العاثر رِدي=يَنْهَض ولكن مايفيدِ مْنَ العزوم الطافيه
له مرقدٍ في خَلْوة المسجد والى فَزّ ايْغَدِي=ماعانَق اطْيُور الفِلاح او خِيرة الله خافيه
والى ذكر ماضي خياله وانْتِبَه قلت ابْعَدِي=بالصيف ياعِدني طَراوه والمشاتي دافيه
والواقع انِّه عن هوَى قلبي يجَانب وايْعَدِي=ياحَظِّي ان زالت معاناتي وصرت ابْعَافيه
ماكنِّه الا عن نجاحه بالمشاوير امْحَدِي=يِشِّر بعينٍ ناعسٍ طرفه وعينٍ غافيه
هذي هي السِّيره تطَنَّزْ (1)_ يا خلف _ وِشْ في يِدِي=مامِن نَعَم لكن على الطَّاير يجيد النَّافيه
راحت سواليف المساري والتِّحِرِّك بالجدِي=ايَّام ميدان الرفيعه عند باب السَّافيه
وقت الجهل يانفس هاتِي واركعي لي واسجدي=مافيه فرقٍ بين شيخ النَّاحيه والمافِيه
انشدِ اهْلَيِّل(2) كان غَزْوِهْ بالمشاوير اطْرِدِي=والشمس يَشْوِينا لظاها في سماها الصافيه
ماهوب من شين المذاهب لانِميل او نعْتِدي=لكن شبابٍ مالقَى فيه الرِّعَايه كافيه
عند النصايح نستمع راي المعلِّم واَنْهَدِي=من وافِر الصحه علينا نِعمة الله ضافيه
ياحلوة الايام عِدِّي ذكرياتي واشْهَدِي=ياما من الضِّيم المركَّب بالليَال اللافيه
فَتْق الليال السود يمكن به عواصف وابْرِدِي=جوف السنين القادمه تحتاج ساعه رافيه
ياليتنا نقدر نَوِفِّر عِندنا الجو النِّدِي=يَرْضى طبيب الوقت في وصف الشفايا الشافيه
مابالجزيره لي هوى حَرِّف وصَرِّف مقصِدِي=فِكْرةْ خوِي الجنب عندي صَوَّرَتْها القافيه