يالرفيق اللي منوّل كنت أنا وانت رفقا = من قبل لاتكشف الأيام ما خفا اللثام
كنت أظنك تبعد أكثر عن هقاوي من هقا = لو حكوا لي عنك قلت اللي تقولون اتهام
كيف اصدقهم وانا ما شفت منك إلا النقا = فوق حسن الظن عندي كنت باني لك خيام
كان لك عندي غلا ماكنت اكنه لشققا = يعلم الله إنه أعلى من دراجات الريام
وكانت عيوني لشوفك لا تغيبت توقا = ما تصدق لوما اشوفك صابني مثل الهيام
وانكشف عنك الستار اللي نقشته بالتقى = وبيّن اللي كنت تخفي بين جسمك والحرام
واتضح لك صورتين كلهن فيك لصقا = كل صورة تختلف حسب النوايا والهمام
وبيض الله وجه ظرف ناش بي حد الشقا = أشهد أن الرف هذا يستحق أعلى وسام
انكشفت وما بقى لك في ضميري من بقا = انخذل من عد مثلك عن شداته حسام
وذا وهي تو النوايب ما بعد جات وسقا = توها بالريش ما جت بالصليب من العظام
اختلف لونك وقمت وكل ما منك دنقا = وارتبكت وطحت قبل الباب عند الانهزام
ودام شارات الصداقة من مباديك اعتقا = ما بقى لك في ضميري وزن ذرة من مقام
وما اجي لك لو يديني من عطاياك غدقا = عيب ينزل للردايف من تعلى بالسنام
يبست غصون الصداقة عقب ما هيب ورقا = وامحلت ريضان عرفٍ كان يسقيها غمام
وانفتح باب الفراق وما هقا ان عقبه لقا = المحام اللي تحومه مالنا بجوه محام
ودامت الدين النصيحة وانت من ناس غرقا = من ملك عرفي لزوم ينتشلك من العدام
اسمع آخر ما قطفها الرأس من قاف ونقا = وصاغها بالطرق الأجمل وأصبحت مسك الختام
كان لك وجدان مثلي للمنيفات عشقا= انشد اللي من بحر بقعا شرب قبل الفطام
ان جهلت العلم فاسأل وانشد رجال وثقا = رايهم قنديل نوره يطرد ادماس الظلام
انشد اللي راح وابعد في طريقه وش لقا= اطول دروب المسافه يختصرها بالكلام
عن خطر وعر الطريق اللي مشى فيه ورقا = انشده عن كل شئ ولا تقول أخشى ملام
وافتح إذنك للكلام وخل عينيك حدقا = انتبه له يجتهد لك لا لقى فيك اهتمام
ولا خذيت العلم إشهر لا تلفت للتقا = خلك الساطي وغامر لا يذيّرك الجهام
اطلق عقال التكاسل واتبع ركاب البقا = وادحر ابليس الرجيم ولا تسلمه الزمام
واستعن بالله وحده ما حد غيرب يقا = أسأله ياقاك شر النفس ودروب الحرام
وأحسن النيات خلك أنت واياه صدقا = قالوا النية مطية وأنت سقها للسلام
والسحاب اللي تحدر اتبعه شف وش سقا = عس مضراب السحابه ثم شد إله الحزام
ولا تقول البعد يرهق والمجاهيم رهقا = لا تعليت المطية شلها طرق الهمام
انهمه بالصوت تطرب كلها تجي سبقا = ما تقاصر في خطاها لين تاصل للمرام
من يصدق المطايا للمطاليب شفقا = ما يرده عن هدفها كود ماثوق الخطام
والبشر سبحانه الله خالق الخلق فرقا = ناس ترجع في خطاها وناس تسعى للأمام
هذي الدنيا مكابد لا حياة بلا شقا = لا تظن الرزق يأتي وأنت غارق بالمنام
وإن قراك العلم ولا فالطواريق طرقا = أطرق اللي لا طرقته فيه تلقي الانسجام