لا باس ياللي عفتنا ما تبينا=لابا س والدنيا لها اقفاي واقبال

لو الليالي جت بصفك علينا=يجيك منها ما يكدر لك البال

وتشكي من الدنيا مثل ما شكينا=ما طاب لك ما دام قيلت بالأمثال

مسموح في بعدك ولو ما رضينا=من حيث ماخطينا على كل الأحوال

يوم إنّ كلٍ ما وفى لك وفينا=في ظني إنك للوفا منت قتال

احسبك يوم إنّا ودادك شرينا=تجزا الغلا مثله لو إن الزمن طال

فتحت باب القلب لك والتقينا=مالي ولا لك شف بالناس ينقال

وحنا على عهد الوفا لك بقينا=القلب يوم إنك وفي عنك ما مال

بالحب حنا ما طواري تجينا=ما نيب مثلك زايف الحب ملال

على الهوى نثبت لمن يهتوينا=ومن راح ما حنّاب طرّادة أزوال

ننساه مع ماضي ليالٍ نسينا=نقول حلمٍ طافنا ليل وانجال

والله ما منك ا لجفا ذا هقينا=لا شك شوف العين ما عقبه إشكال

كم ليلةٍ بيني وبينك حكينا=تنهان أنا وانهاك عن كل عذال

نخاف من فرقا تجي ما درينا=وانت الذي لفراقنا صرت مدخال

مابين ليل وبين يوم انتهينا=حطمت حب القلب وانهيت الآمال

ماكن حبٍ بيننا قد بنينا=اقفيت واقفينا وكلٍّ على فال

ما عاد لا نرجي ولا ترتجينا=باب المودة بيننا شد باقفال

أقولها لو بالنوى ما سلينا=نذكر وفا الماضي وحبٍّ لنا زال
لا شك وش ظنك بقى في يدينا=إلا نعز النفس عن درب الإذلال
لازم نصد العين لو مابغينا=اللي تبدل نرتضي فيه الإبدال
والعذر معنا بالجفا ما بدينا=منك الجفا .. منك الخطا .. منك الإهمال
والله يوفقنا على مانوينا=قلبي بعيدٍ لو تذكّرك رحال
منك الرجا عقب التغلي طوينا=نجزاك ياللي عفتنا جنس الأعمال