يابنات الشام ياشبه الورود=نعنبوكن كل أبوكن ساحرات !
كل عقلٍ تاخذنّه مايكود=والله إنه ما يجي فيه الثبات
بالحلا والملح والطبع الودود=والحكي مثل العسل بين الشفاة
وين قلبي يانعيمات الخدود=أشهد إنه ضاع في مثل الفلاة
مع حبيب فاتنٍ غضّ النهود=لا قعد من بينكم مثل المراة
فاحت الغوطة وسالت دهن عود=يوم جاه الزين من كل الجهات
واعسى لاماك وأيامك تعود=ياصبيح الوجه ياعين المهاة
هلّت العينين لك دمعي شهود=من غلاها للعيون الغاليات
والله إن الحب ما ينقص يزود=في ضميري مثل مرويّ النبات
من فراقك كن ماني بالوجود=ضاع من دونك شعوري بالحياة
ما قويت أنساك لو دونك حدود=يعترض للعين طيفك ما تبات
لا سهت عيني تبي حلو الرقود=كنها من دون شوفك واقفات
من عليه أشكي عذابي يالعنود=والجروح اللي بقلبي غايرات
دامه الدنيا بشوفك ما تجود=وأقفت أيامٍ منوّل مقبلات
خلني صابر على غير مْعدود=لين يفرجها وليّ الكاينات
ما صبرت إلا على الصبر محدود=لو يطيع الوقت عاينت السواة
ما معي غير التحري للوعود=والرجاوي والعيون المشفقات
لين يندار الفلك عقب الركود=والرجا بالله ما هن خايبات