ودك ولو كثرت عليك الغرابيل=ما تشتكي همّك على غير مولاك

تصبر وترجي بالليال المقابيل=من فزعة الله ما يسرّك بدنياك

لا عاد مالك بالسوالف محاصيل=ما غير نقّاد المجالس تقفّاك

اصبر ويتلى عسر الأيام تسهيل=من واحد بيديه دورات الأفلاك

وإلا زمانك ذا زمان التهاويل=ضاع الرجا به عند ذولا وذلاك

كم واحدٍ يعجبك هرج وتعاليل=تقول يا جعل الرجاجيل تفداك

يا زين هرجه عند صفّ المعاميل=لولاه مِنّا وأبيض الفعل مِنّاك

تبدّل الصافي من البن والهيل=والبوم غنّى عن يمينك ويسراك

مالك ومال معابل العدل والميل=خَلّك على عالي مقامك ومبداك

المقفي اللي ما يبي له مداخيل=اقصر هواجيسك عنه واقصر خْطاك

انس العلوم اللي مضت بالتفاصيل=وابعد مثل ماهوب يبعد وينساك

لونك عليه من الغلا تسهر الليل=خلّه لما انّه يسهر الليل شرواك

فلّ الجناح وعانق البدر وسهيل=رايك براسك والدراهم بمخباك

لا شفت بالهرجة تِغيِّر وتبديل=وبان الصحيح اللي قبل كان يخفاك

قل بالسلامة واختم القال والقيل=والله على دربك يصونك ويرعاك