الف اولف بالهوى كل طاروق = وانثر دموع العين بالليل وشروق
واقول يا قلب العنا اترك الشوق = ويقول لا والله وش ذا الجهاله
والبا بلان الله بآخر زماني = في زينةٍ شانه على حد شاني
وان قلت بالله يا صخيف المثاني = قالت انا بمرك وهذي سهاله
والتا تراني بالمساري مجرب = وامشي على راي الخوي واتورّب
واخاف من ناسٍ يقولون خرب = خرب ادروب الزين وين العداله
والثا ثليله فوق متنه رجودي = يشبه إلليلٍ من سرا به ينودي
يرقد بتال الليل في وسط بودي = يصبر على الشدات راع العماله
والجيم جلل لي حبيبي جروحي = اسهر طوال الليل فوق السطوحي
اهيم واعول بالبكا ثم انوحي = واقول جمعاكم اظنه محاله
والحا حلي الزين زام الردوفي = خشفٍ رمقته للمراعي يحوفي
اطلب من الله ما تجيه الصدوفي = يا حلو رعيه في فياض الغزاله
والخا خليلي ما يدور بدالي = وان جت له الشدات اببذل حلالي
وابذل حلالي فوق روس الجبالي = لمين خلي يشتهر في كماله
والدا دليل الدرب ضيع دليله = من يوم شاف ان الحبيب عليله
ما كل عشاقٍ يطفي غليله = ودك الى الرجال يخفي خماله
والذال ذللت المصاعب وعيت = تقول ماني من ربوعٍ تهيـّت
والله لو قلبي غريرٍ وميت = وش ذا الهوى ضليت درب الجماله
والرا رماني بالهوى كل زينه = ويلاه يا قلبٍ تجدد حنينه
يرقد بتال الليل عند الضعينه = ما شال هم الزين غيره وشاله
والزا زاني حب زين الحبايب = حيث ان هالدنيا لياله عجيبه
احدٍ غدا بالدرب واحدٍ بصايد = واحدٍ رقى رجمٍ والاخر بجاله
والسين سل الروح من وسط روحي = عاقن وانا والله رجلٍ طموحي
طموح بالشدات لا اسمع ولا اوحي = وان كان ما ساعف لقينا بداله
والشين شاورته وقال استمع لي = مانيب مجبورٍ على ما إضمر لي
ان كان تبغيني تورد لحملي = تكفلن يالجزل راع الجزاله
والصاد صد وعن طريقي ربوعي = امشي واحسب كل شبٍ وبوعي
مثل الذي يركب على متن شوعي = وسط البحر تايه ويتلي ظلاله
والضاد ضليت االحبيب السموحي = ياليت روحي دون روحه تروحي
والا فطق الراس في حد صوحي = واقول حالي للحبيـّب حلاله
والطا طواني حب مدقوق الالعاس = ياما حلا الخدين مع قضـّة الراس
ودي احوشه دون غيره من الناس = وان كان ما وافق فباصير عاله
والظا ظلمت الروح مما لجا بي = اعول وانوح الليل وانقل صوابي
واقول يا ربعي وش اللي حدابي = قالوا صويب الحب خله بفاله
والعين عيت لا تطاوع عيوني = ومن البكا هاضت علي الشطوني
اصيح واتلي بالليالي لحوني = وراع الهوى يشقى وهو من زواله
والغين يا غلي من اللي رماني = في هدب سود اعيون نجله طواني
طيت كتابٍ مرسلٍ به عماني = دربه بعيد وكاربينٍ احباله
والفا فريدة ريم عاقت لحالي = عساه تصفي لي وانا افدي بحالي
واعطي لها مملك وكل الحلالي = ودي تقابلني وبقعد اقباله
والقاف وقفنا جميع القصوري = نبيه سبيلٍ لليتاما القصوري
وايضا ابنحر لليتاما جزوري = هذا طريق الرب وحنا نساله
والكاف كفت من دموعي عيوني = ويلاه يا قلبٍ تتله اشطوني
تلة ادليٍ من مياه العيوني = قالوا يعزا قيل حبه عزاله
اللام لاموني جميع الربوعي = قالوا غريرٍ في هوى كل نوعي
قلت اسمعوا يا ناس هذي طبوعي = حبيت ريمٍ من خشوف المحاله
والميم مليت الهوى من عذابه = ويلاه يا جسمٍ تكدر شرابه
من يوم لاريقه شربنا عذابه = صار الهوى والحب والله عباله
والنون نوّر لي حبيبي وراحي = وادعان مهمومٍ ولانيب صاحي
امشي وادوه شال مني سلاحي = ولاهوب هاقن لي علاما هقاله
والواو ولعني وخلان مجروح = اسهر طوال الليل بالخد مطروح
واصيح واعول يا فهد واكثر النوح = واقول يا غروٍ زها في دلاله
والها هو اللي هالني في حلاياه = لاهوب رايمني وانا ازريت لاسلاه
نوره يشع وصافياتٍ ثناياه = نبنوب عودٍ راويٍ في سهاله
واليا يا قلبي وميت نظيري = ترا الهوى يذبح بسيفٍ شطيري
يا خشف ريمٍ هاربٍ مستذيري = اترك ملاح المي واشرب زلاله