رحت بيوم السيل مسيّر=عازمني فلاح خيّر
يسني هرشين وحميّر=والعقايب ثور وأمه
يوم إني جيت إلى ماهم=ماغير اللي من سماهم
مابالبركِه من مَسناهم=ماتدفع به غصّة لقمة
وإلى أن الهِرش يقَزُّونه=والثاني ماهو من دونه
وأشوف الثور يعَضُّونُه=وخضيّر حاله منسمّه
غثتني حالة رفيقي=واحترت وغصِّيت بريقي
عودت أركض مع طريقي=وأثري ماسنَّعت اليَمِّه
أمشي وأهوجس بالجاري=مع دربي من غير مباري
مِمرِس ولا أَدران الداري=إلا وأدرَع لي بمطمِّه
شوشة ضولٍ في مِنحَات=يجرُّون بعيرٍ مات
ويعَضُّون الأوخرات=والمَسنَى يموج بدمه
لاتنشد عما جرى لي=من حال الأول والتالي
من غربال في غربالي=والخافي عند الله علمه
مشيت أفكر وأسترجع=بأمورٍ توجع وتفجِّ
ولاغير المولى مرجع=اللي يفرِج كل كل مهمِّه
دخلت لبيتي ملتاعي=لو قلبي جلمودٍ ماعي
بين النِّيم وبين الواعي=من حزن سيَّر بي سمِّه
لاعادت ذيك التسياره=تقل أوقِّف في معاره
وإلا في مقصب جزَّاره=بين المذبوحه والرِّمه
ياعيني عين الفلاحي=في زمانه هاللي راحي
ماشاف بدنياه أفراحي=من دينه مابارح همه
ماحدن ينسى هاك الحال=والسَّواني والدِّركال
والدَّراجه والمحَّال=والعمال وقطع الذمه
قطعت الجيه والروحه=كود فوادي يبرد فوحه
والفلاح تربِّع روحه=ويفتِّح من عقب الظلمه
وأنا قلبي عند صْحيبي=ذاك الفلاح الرحيبي
لو هو يرمي به نصيبي=بالديره يومٍ وأَعَزمه
لاجل استفسر عن حواله=وأدري عقبي وش جرى له
عسى عيشه كد صفا له=وانزاحت هاذيك الغُمِّه
أخذت أيامٍ مازرته=ولاشافن ولاشفته
ولا بالديره صادفته=قلت أباطلع عاني لمِّه
ظهرت لرفيقي مومي=أبي عن حاله معلومي
وإلى مير اللي لي يومي=مع سوق المكان بكمه
نصيته عجل وشفقاني=وهو ماقصر لاقاني
سلمت ورد وحياني=قلت اشلونك قال بنعمه
قلت اصدقني قال الحقني=تشوف الله وش رزقني
ماخلاني من خلقني=وأخذه واعطايه عن حكمه
دخلنا الحايط من برا=وإلى أنه سندسةٍ خضرا
وطيوره بأشجاره تقرا=على أزهاره لها نغمه
والما لانهاره هديري=وقتوتٍ مثل الهصيري
والرَّعاد بوسط البيري=أثر الَعَمِّه وسط الجمِّه
العَمِّه ذي بستم نايم=ماله راس ولا قوايم
غير جرانٍ فوقه نايم=عليه الما مثل العِمِّه
شيٍ يشرب مع البومه=ثم يِخَرِّج مع بلعومه
ياللي تسمع للمنظومه=وش شيٍ يشرب مع صِرمه
كلٍ شاهد من ذا عِينِه=واللي شايفٍ المكينه
كد شاهد هالغطو بعينه=مايحتاج نصور رسمه
حديد وباسٍ شديدي=مايمِل ولايبيدي
إروي ياخضر الجريدي=ريف الجايع وأم اليتمه
مابه رقِّع ياخراز=هات سيورك والمخراز
أُورِد صدِّر ياعجَّاز=ياعاملنا يالدِّعْرمِّه
لدِّيت لراع المكاني=أَثره بقهوته يتناني
صوَّتْ وفاض وناداني=قال غْدَيٍٍّ مايسوى اسمه
تعال ابصر في هالغدوه=اللي ربعه يكفي ندوه
كل بخيلٍ جعله فدوه=لصحيبي راعي هالكرمه
شكرته شكرٍ مطبوقي=قلت أخلفت بطيب وفوقي
وأطلق الله عنك العوقي=عقب الفقر وشِين القِمِّه
منوَّل بلشٍ ومشيحي=بين الجربا والصحيحي
هات رْشا هاتوا سِريحي=ضُم العامل لاتضمه
وفوادك يومي معلوقه=لاقيل الناقه مسلوقه
والعامل حلَّن حقوقه=وإلا هوَّن يبي قِدمه
قال المنِّه للمعبودي=ماعنِّي والله منشودي
كثرت خيراتي ونقودي=وأبي الشيخه لولا الزَّحمه
بالقيظ خبيزٍ ولبيني=وبسِيِر وقطَّارٍ زيني
وشتانا قشدٍ وحنيني=والمغرب قرصان ويَدمه
المرام إن المكاين=ريَّحن إلا ذناين
فضلهن كالشمس باين=ماتشوف اللي يذمه
المكاين يالذهاني=يزعجن الريهجاني
بطَّلن كار السواني=ذاك طورٍ غاب نجمه
والحزم الحزم الممتازي= في توريد الإرتوازي
ماتبي لك زيت وقازي=ولاتحتاج أية خدمه
لعل الله يامر فيها=ويسهلها ويمشيها
لنخيل الفيحا ترويها=والشِّطِه تقفي منهزمه
ماعلينا خمِّس سدِّس=إلى دلى ماها يرجس
مع السلامه يامهندس=حتى ريحك لانشمه
إن قام الشعب بتوريده=لامٍّ تغذى من ديده
فذي اللي عليه طول إيده=ماللوالد غير الحشمه
أويَّ مشروعٍ سامي=مايحضى فيه النوامي
حظ الشعب اللي به قامي=عظم الهمه يحي الأمه
تمت وختامه ياساده=صلوا على خير خير عباده
وآله وأصحابه وأجناده=عدد مايمشي من نسمه