سرحان جر الصوت في كل ليله=دام العوا يطرب مسامع من أوحاك
أنا نديمك فوق راس الطويله=يوم إن بعض الناس أقــفى وخلاك
ياذيب مالي بالمقادير حيله=لو تشتكي علم ن وصلك وتعداك
لابد تلقى للطريق الدليله=عقب العسر يسر ن ولا هوب يخفاك
لي صاحب ن قبلك يمينه بخيله=ماعاش في دنيا الغرابيل وياك
ماله على درب المراجل وسيله=ماصار مثلك تعطي الخير يمناك
كل ن على ما قال ياخذ حصيله =ما مسته ياذيب عوجات دنياك
( والحكي واجد والصمايل قليله)=رايه يورّد بك على حبل الإدراك
عشره مع أشكاله ومثله فشيله=نوماس نفسي يوم أخاويك وعواك
ولي صاحب ن لو تاصله وتعنيله=وتدخل على بيته يبشرك برضاك
محد ن يضيم اللي زبنه ودخيله=قرم ن سنافي يرخص الروح يفداك
ما مر في درب الردى والرذيله=ماهو مثل هذا ولا هو مثل ذاك
ياذيب شلناها حمول ن ثقيله=ولا عوينا يوم كثرت وشلناك
وأنا أشيله لك بنفسي جميله=سحم الظواري مالها غير مفلاك
يقوله اللي بالطويل تعويله=شق النهار أستودعك رب يرعاك