والله من فكرٍ ضحى اليوم محتار=يجرّ ونّاتٍ حملهن ضميري
الليل كنه لين يبدن الأنوار=النوم عفته ما يهملج نظيري
أخيل برّاقٍ على الصلب سَمّار=وسحبه تهل وركّزن بتحديري
والبر كاره لا تغبّط بالأمطار=وكلٍّ يقول العشب يمي كثيري
سقوى إلى منّه كسا القاع نوّار=تلقى الزبيدي في قرارٍ محيري
يا زين والله بالفضا شبّة النار=لا صار وزن البيت عشبٍ وديري
ذولا يجون من أيمن النزل عِبّار=وذولا مساييرٍ وهذا بشيري
وتماثلوا من بينهم رد الأخبار=وزين المقهوي بينهم يستديري
وراع الولع يتلي صحاصيح الأقفار=جولٍ يصيدونه وجولٍ يطيري
ومبرقع الصفّار عن شوف صقّار=والكل منهم قال هدّيت طيري
ياليت من ياخذ مع البدو مقدار=مقدار عشر سنين معهم يسيري
ودي بسجّات الضحى يابوعمّار=ويمضي زماني من قصير لقصيري
يلومني دحشٍ سواليفه كبار=ما له مع البدوان وِرد وصِديري
لا زايرٍ حيّه ولا هوب منزار=ولا قيل هذا للنشامى عشيري
رجّال بالخلقة وهو مذهب حمار=خلّيه يا شقر المجاديل نِيري
البنت مثلك بالمشاكيل تختار=خله يديم البيت عنه استخيري
ما ينفعك كمْخٍ على النوم هدّار=وعند اللوازم ما يداني الصفيري
قلته وكلٍّ له تصانيف وأفكار=وراع الغنم يضحك براع البعيري
كلٍّ بعقله راضيٍ عنده إبصار=إلا بماله ما يداني الخشيري
وقالوا بعد لولا تخاليف الأنظار=كان السلع بارت على علم غيري
وترى السوالف به طويلات وقصار=وأرجي السموحة من صغير وكبيري
الله يسامح كلّ خيّر وعذّار=وهذا كلامي بالمثل وتعبيري