ليلة خميس وكلٌ حيٌ وشانه=ذاع المذيع اللي فجانا بالاعلان

شاع الخبر عبر الفضاء من بيانه=هزٌت معه كل النواحي والاركان

قال اسمعوا والله عظيمٍ بشانه=الموت ما يسترجعه طول الاحزان

الروح لابن آدم سواة الأمانه=ان حل ميعاد الوفاء والسفر حان

شيخ الديار اليوم خلاٌ مكانه=من جامع الديره ومن كل الاوطان

لو لا الله اعطى النفس صبرٍ واعانه=كان البكى بالناس باشكال والوان

أمه عنيزه وارتوت من حنانه=تبكي على ضمه مع اهلٍ وجيران

وامر القدر حدد مكانه وزانه=بأم القرى له بالثرى خير مسكان

شيخٍ عطانا من علومه حصانه=بيٌن لنا بهدايته كل برهان

مالوم ياقلبٍ بكاه ابتكانه=لك حق موته به مصيبه وخسران

مرحوم ياشيخٍ من اول زمانه=بالحق سيف وحامل الحق سلطان

مرحوم ياشيخٍ عفيفٍ لسانه=قلبه صفاء للدين في كل الاحيان

مرحوم ياشيخٍ عليه الرزانه=جسمه رحل لكن علمه بالاذهان

مرحوم ياشيخٍ بحلمه ليانه=لأهل التقى وإلا المضلين بركان

ربي حفظ دينه بمثله وصانه=يجزيك في تقديم الإحسان باحسان

يفتح لك الفردوس باعلى جنانه=في رحمة الله مسكنك ذات الأفنان