عز واليك يابرقٍ تخيله عيوني=استخيله وانا ما ذقت ماه ونباته
برق مابه رعد من مرزمات المزوني=منوة العاشق المغرم ولذة حياته
آه انا المضمي اللي يابساتٍ غصوني=مير ما كل من يطلب يحصل مناته
آه واكبر همي مع كثير الغبوني=كل ما اقبل سمار الليل واضفى عباته
السهر جا عيوني من سبايب عيوني=ليت راع الحساني ما يخلي حسناته
آه ياليت خلي ما يخيب ضنوني=ما يخلي المواصل لين تقضي حياته
انت ياللي على حالي تقول وتموني=إرحم الحال والمخلوق عينه مراته
يا هلي وان ذبحني صاحبي حللوني=ثم رشوا على قبري دموع اعبراته