يا وجهي السمح خل البسمه العذبه = كيد البشر لا يهمّونك فعايلهم
كم راي مابيه عاند راي ماخذبه = امشي بكيفي رغم آراء شايلهم
اهدّي الفكر عن شهوات وآهذبه = واقصر يديني ولو ان كنت طايلهم
كاتب على الصدر جملة كنّي اشحذ به = يالله تعوّض خفوقي في مثايلهم
ناسٍ لهم كانت الاشواق منجذبه = والحين في الوصل ما توفي مكايلهم
غرقان في بحرهم ما شفت منقذ به = وبعكس احباب تغرقني جمايلهم
جرّوا رفيقي على أمرٍ ينفّذ به = وياما كفتني طبايعهم هوايلهم
واثره على جرحي الدامي تلذّذ به = وباقي جروحي استخفى دلايلهم
حلف بقولة حشا ما يقصد يْعذبه = وانا بقولة حشا يعمل عمايلهم
مسكين أصدّق كلامه حتّى لو كذبه = وشلون ما اصدّقه لا صار قايلهم؟