شعراء عنيزة - كلمتني بنت وتو انا عريس ** والشهر ما طاف ولا حولك يطوف (قصيدتي الجديدة )

السلام عليكم اخواني مرة اخرى ..

الحقيقة .. هذي قصيدة كتبتها اول ايام رمضان وكان سببها :

رن جوالي ويوم اني رديت اثرها بنت وبدت الله يهديها تتكلم بكلام ازعجني .... المهم اني ولله الحمد صكيت بوجهه وكانت المعزبة جنبي ( ما يمدين اسوي شي) والصحيح مهب عادته تسأل عن المتصل الا هالمرة وكنها حاسة قلتلها السالفة وتسمع من هالدعوات اللي الله يجيرك الصدق اني خفت على البنت من هالدعوات ... المهم انها اتصلت مرة ثانية وثالثة ورابعة لين عطيتها زوجتي وورتها الشغل ( بنت رجال ) وعقبها ما رنت ابد ( والله مادري وش هي شايفتن بي والله لو تشوف ن كان تتوب مرة )

واليكم القصيدة وبانتضار ارائكم وانتقادكم ....

كلمتني بنت وتو انــا عريـــس ** والشهر ما طاف ولا حولك يطوف

كلمتني كـنّها تبــــي الونيــس ** بالشهر اللي به الرحمة تطوووف

قلت خافي واتركيني يا فطيس ** وابعدي عني لو ان اسمك هنوف

اتركيني ماني في عرفك خسيس ** انا من حمايل نجد واعراف الوصوف

العتب على ابوك اللي ما يقيس ** يترك الجوال بيدك ما يشوف

والله اني من تزوجت الونيس ** مالتفت يمك ولا غيرك يحوف

والله ان قليبي في صدره حبيس ** ماانثني عنها ولا غيره اشوف

اخوكم نقي القوافي..\

محمد عبدالله الخليل