مع كل حزن وكل دمعة دخيله=عادت على صدري همومٍ طوابيق
وامشي على صدر السنين البخيله=وابكي على دربٍ تيبّس به الريق
واندم على جفونٍ تدوّر مقيله=وانام واحلامي بليلي مخانيق
لي ساعةٍ في دنيتي مستحيله=ما شفتها مرّت بدنيا المخاليق
أسوق فيها المعضلات الطويله=وعيبي انّي للطويلات سويّق
عاندتها يمكن تحن وتشيله=رغم اني ما احب المعاند ولا اطيق
يا وجد حالي في زمان الرذيله=كل ما شياطيني على ذنبي تويق
خاويت عقلي بين ناري وهيله=وعلّمني اسبح بين ناسٍ غواريق
وعلّمني امشي في طريق الفضيله=لا هلّت مزون الحزون الزواريق
وعلّمني ان اهل العقول الثقيله=ماهم مثل اهل العقول المصافيق
نفضت صدري والهموم وحصيله=وخلّيتها بدنيا التعاسة معاتيق
مليّت من وصل الحروف ورحيله=لا صارت افكاري طيورٍ مطاليق
تروح وترجع للضلوع النحيله=مسبّحات الله لانهن مرازيق
تهبط على صدر الشعور النبيله=وتقتات من فيض الحشا والمعاليق
في صوتها تغريد لو هي عليله=واسمع صداها بالجبال الشواهيق
غنّت على لحون التراث الاصيله=وعاشت ولا تدري وش الحزن والضيق
وافرح واعيد الذكريات النزيله=مرسومها في جدار عقلي بتعتيق
واغمض عيوني والدمع يشتكي له=والقى دروب بذكرياتي مغاليق
الاّ طريقٍ ما دريت انحني له=رجليّ تمشي في رصيفه مزاليق
مكتوب اسمه ( الرموش الظليله )=ومن خلف اسمه ( الرجّال المطافيق )
يا هيه يا ام الفاكهات ونخيله=اخترتك انتي لاني انسان ذويّق
اهيم في نظراتك المستخيله=وانام في روضات زهرك ولا افيق
وفي شوفتك عيني تدوّر بديله=ودمّي مشى عكس اتجاهه ولا عيق
وصدري يلف انفاسه المستميله=ونبضات قلبي صارت اليوم تصفيق
في مبسمك كثرٍ يساوي قليله=في أوّله دهشه وباخره تشويق
رفعتي قياس الصفات الجميله=وغيّرتي اسلوب العهد والمواثيق
وقلّ بزمانك مادحين القبيله=وكثر بزمانك العنس والمطاليق
يا بعد روحي ما مثلها مثيله=يا راس مالي والعذارى تفاريق
اللي ورى التجميل دايم ذليله=جمالهن مكياج زيف ومساحيق
من وين ما افرّ الملامح هزيله=ومن وين ما اثبت في وجههن تشاقيق
يعني العقول الفارغات الهبيله=لا تحسب انها في نظر عيني تليق
انا وحبيبي بألف ليله وليله=عيوننا في مشاهدتهم مشافيق
وخليل لا منّه حكى عن خليله=يحتاج من كل المخاليق تدقيق
الاّ انا لمّا ذكرت الكحيله=ما احتجت رايٍ منك وما احتجت تصديق