ياروح عاش اسْلُوبِك الحَيّ يَاضِي=عنَ الْوْهَيِّب بَافْضَلَ الشُّكر حِيِّيت
وَفِّيت ياكاتب وشاعر وقاضِي=وَفِّيت ياشيخ الثِّقافِه وكَفِّيت
وَفِّيت في تقدير صَرْحٍ رياضِي=عشرين عامٍ كامِلِه ذَايِعَ الصِّيت
وَفِّيت في مِشْوار حاضِر وماضِي=تَقْرَا فِصِيحَ اهْلَ الثَّنا ماتَهَجِّيت
شرحٍ كِتَبْتِه مايِجِيِه انْتِقاضِي=أَحْلَى منَ التَّوثيق ذا ماتَحَريِّت
ماتَرْمِيَ الاَفْكَار مَلْيَان فاضِي=مِيزانِك الحَسَّاس ماقال ياليت
فِكْرٍ على نَظْمَ الحقايِق امْحَاضِي=دَاخِل جُيُوبَ الكَمْبيُوتر بَنَى بِيت
ذِكْرَ المحاسِن مِثِل زَهْرَ الفْيَاضِي=مايَكْفِيِ انَّ الحَيّ يَبْكِيِ على المِيت
هذا كلامٍ ماعلِيه اعْتِراضِي=بالشِّعر اقومِ بْوَاجِبي ماتِسَلِّيت
والوقت بِعْنِيزِه والاَبْطَال راضِي=لولا الفَخَر في ديِرِتي ماتَغَنِّيت