قالو تحبه قلت بالحيل بالحيل=حب لجا بين الضلوع المحاني
قالو نهارك مقبل يطرد الليل=خلك مع المسجد بوقت الأذاني
جاوبتهم ياهل العقول المخابيل=افكاركم حطوا لها ترجماني
احب ام ولدت بالرجاجيل=رجالهم يصهل صهيل الحصاني
ان جاء نهار فيه هوش وتبديل=ترخص عمار دون وصل الغواني
اللي علي الرجلين واللي علي الخيل=نطاحه للموت والعمر فاني
مهابيل والله لو نسمى مهابيل=موت الحرج ولاحيات الهواني
دار حموها دون دفع وبراطيل=بالسيف هو والرمح والجبخاني
دار حموها يوم عصر الغرابيل=عن كل مطنوخ ويرجع امهاني
عدوهم يرجع مثل رجعه الفيل=يوم ابرهه جنده غدو مرمهاني
لو تنشد التاريخ جيل بثر جيل=يعطيك حامض فعلهم والسماني
وقت الكرم تلقا رجال مشاكيل=كلمه هلا ياضيفنا المرحباني
شبابه للنار وصفرا بها الهيل=مع قهوة الخولان والزعفراني
وصينيه بيضا بهافطح الحيل=وارثو كرم حاتم بذاك الزماني
هذي عنيزة شمعه وسط قنديل=يرتاح به طرقي ومن جاه عاني
باريس نجد مانبي له تباديل=هي امنا هي عزنا بالتماني
فيها البواسق شامخات مضاليل=وأشجارها من كل صنف ولياني
ماها عذي صافي من شهاليل=مشروبها يشبه عصير الجناني