سلام الفين يادار وطتها رجل حوريه=عسي وبل الحيا يسقي غضاه وشامخ هضابه
بديمه عشرة أيام حقوق الوبل وسميه=عقب ماهي بلاقعها غبار فزت اعشابه
نباته بالخزامي والنفل وأزهار بريه=مداهيل العنود اللي سبب حالي من اسبابه
سبب حالي عصر شفته علي جو البراكيه=وانا درب الهوى كسرت مفتاحه علي بابه
تجدد غرام اللي جلبه الله لي سيه=وردتني علي عصر الجهل بجيوش نهابه
تشيل جيوشها معها بلا سيف وشبريه=بكتف وردف مع صدر رضيعه ماتلوى به
وعين من ورى البرقع مثل عين النداويه=وعود الخيزرانه مع جديد اللبس تزهى به
الي منه مشت كنه بحبل القيد مزويه=تغطرف بالقوام اللي لها رب الملا جابه
ألا ياليتني يوم أتمشي صافي النيه=ولا شفت اللعوب اللي تلفلف عني بثيابه
غديت بحال بهلول تعوده حال نفسيه=علي همي وتفكيري وضيق الصدر وهندابه
فسيح الارض ضاقت بي بعد شدوا عشاويه=وقفت اصارع همومي ونفسي منه منصابه
مشيت أدرج الخطوة علي نارة وهي حيه=أدور شي من عقبه يسلي وأتلهي به
ولا حصلت غير اللي يذكرني علي الجيه=شبحها بالمكان اللي قدم رجلي تمشي به
مناديله علي حجير ناره نثر مرميه=وثوب من قماش أخضر عن الطرقي تذري به
أخذت الثوب باليمني لقيته في ذري الفيه=وقمت أشم ريحتها تفوح بريحه أسلابه
فرضت أزور منزاله بكل أسبوع عصريه=الي جيته حنيت الراس وقمت أقبل ترابه