شد الرحال وهات لي زين الأخبار=من عند مظنوني ترى الحال شيفه
لولا ظروف الوقت ما همّ مشوار=نفسي على الهجران مثل العسيفه
أبرجي المولى والأفلاك تندار=يرد ولفٍ قام يبكي وليفه
صبرت ست شهور وكني على نار=ولا ليلةٍ مرت ولا شفت طيفه
بالله يا اللي للهوى عندكم كار=عِزُّوا مودتنا تراها ضعيفه
عقب البطا والبعد انا اخاف تنهار=وأصير مثل اللي وقع بالنصيفه
العام يوم الرجل ما عافت الدار=ياخذ غريفي ثم انا آخذ غريفه
يا طير يا طيرٍ تربّى بسنجار=تخافه اوحوش الفلا من وحيفه
بالله دوّر لي خراجٍ ومعبار=أقفى ربيع العمر وأقبل خريفه
لا تعالجن بالصبر ما نيب صبار=وشلون تقوى الصبر كبدٍ رهيفه
جمايلك واجد صغيرات وكبار=واللي نخاكم ما تحزم بليفه