يارب أعذني من الذٍّله وتكسير الجفون وقصرة الشـوف=ومن نظرةٍ للرجال أكبر من الحجم الطبيعـي للرجالـي



ومن اختلال التوازن وانقسام الفكر بين القطن والصوف=ومن اندفاع العواطف دون تمييز البعيـد مـن الموالـي



وبداية الإنهزام الداخلي اللـي يزلـزل داخـل الجـوف=مصـور الوهـم بابعـادٍ ثلاثيـه حقيقـه وحتمـالـي



واعزني بالتوكل والثقه بالنفس وامنّـي مـن الخـوف=وثبت فؤادي إلى جا الموقف الغصّاب لو آقـف لحالـي



يامالك الملك ياعلاّم ما بالصدر من حاجـات وشفـوف=ياسامعٍ في ظلام الليل في مِلْس الصخر دبـي النمالـي




يافزعة المستجير اللي على بابك ياغايث كـل ملهـوف=ياصاحب الإقتدار المطلق اللي ماضيٍ فـي كـل حالـي



مدام الايدي صِفِر من فزعة الدنيا ولا بالوقت معـروف=تقطعن الحبال من الزمـان وفيـك موصولـه حبالـي



لصار الإنسان في دنياه يتعب والتعب ما هوب مخلـوف=إلى قضى النحب ماسـره ولاضـره عـدال ولاميالـي



ياراعي الطير كيف يطير طيرك فالسما والريش منتوف=اما ان طيرك رخم ، والا انت جاهل مانت صقارٍ مثالـي



سلام مني على الدنيا ولاني مِلْحِقٍ شرهـات وحسـوف=ما نيب انا اول ضحية مجتمع واكيد انا ما نيـب تالـى



لابد الايام تبدي غيبها ويجي لـك المستـور مكشـوف=ويبيّن البدر بعيـون الزمـن هـو مُتّسِـق ولا هلالـي



حتى هاك الحين ، دقي ياكفوف الهجر في طيران ودفوف=وتصافقي ياهبوب الريح فوق اقطابها والـراس عالـي