أفكرت بالدنيا وفكرت بالناس= واشغلت نفسي في حساب الرجاجيل

لقيتهم ياهل النظر خمسة أجناس= والفرق عندي بالرجال المشاكيل

اولهم اللي لاحضر يرفع الراس= قول وفعل مع سلوم ومحاصيل

المرجلة عنده تراها على ساس= مفصل طبعه على الطيب تفصيل

دايم لفعل الخير زارع وغراس= له ركعه مشهوده بآخر الليل

والثاني اللي للمواجيب لباس= راعي نواميس وراعي معاميل

له عادة بالطيب ما فيه هوجاس= يفزع كما فزعة هل الجيش والخيل

اعطا الحقوق وفصل الثوب بقياس= قوم فروض الله وجنب عن الميل

والثالث اللي حط للنفس حراس= فيه الديانه والأمانة مواصيل

لكن ماهو بالمهمات فراس= ايضا ولاله بالمراجل مداهيل

الى بغيته ساعة العسر والباس= اعذر عن الماجوب من غير تمثيل

والرابع اللي له مع الطيب مجلاس= يصخي ويرخي من هل البن والهيل

لكنه لبحر التهاويل غطاس= فضل هوى نفسه على الحق تفضيل

غره زمانه ثم جره للافلاس= ضيع حياته بالسهر والتعاليل

دايم تشوفه يضرب أخماس باسداس= يندم على شين العمل والأفاعيل

والخامس اللي سار في درب الادناس= ما قيد النعمه وصافي المشاهيل

جملة محاصيله غرابيل واتعاس= جنب دروب المرجلة والحلاحيل

أنكر حقوق الناس لو هي بقرطاس= واشغل عباد الله بالحط والشيل

القلب ميت والمعاليق يباس= لا يبري الذمه ولا يوفي الكيل

هذي خلاصة كلمة بين الأقواس= والتجربة برهان يا اهل التماثيل

احرص على المنسب ترا العرق دساس= واحسب حسابك بالليال المقابيل

من شان وقته يشرب المر بالكاس= يا كثر ما يلقى في حياته غرابيل

يسري به الهاجوس ويصير وسواس= ما غير يرقب بالسماء طلعة سهيل

واللي تبسم له زمانه بنوماس= يطعم ويشرب بالغراش المعاسيل

يلقى الذهب صافي ولا غش بنحاس= يقطف من أزهار الليالي تساهيل

اقول هذا والرجا دونه الياس= والادمي يصبر ولو طاول الطيل

صلاة ربي كل من هب نسناس= على نبي عدل الميل تعديل