يا حمود عذري منك عذر المعنا= والا فلا واسيت قبرك بيديني

ياكيف ابدفن هامتك واتهنا= في باقي أيامي وباقي سنيني

والله ما صخيبك لقبر مدنا= واحط رأسك بين لبن وطيني

لولاي أخاف الله واخاف آتجنا= واشكك بديني واشك بيقيني

يابو عبدالله آعذر الصبر منا= وازريت ادافع عبرتي مع ونيني

حقك علي ابكيك وابكي وونا= طول الليالي لين ابيح كنيني

امنول ارجيك لا غبت عنا= ترجع لنا يا خوي لو بعد حيني

واليوم لا والله شبوحك عدنا= في منزل ماجيك والا تجيني

شريدة اخواني عليك آتمنا= ماحدن يعوضك من يسار ويميني

خليتن لحالي وحيد معنا= اكابد الدنيا ولا لي عويني

اغصون قلبي من حنانك رونا= اخو واعدك من حدا والديني

لا شفت انا اطفالك عيوني بكنا= يبكيك قلبي قبل تبكيك عيني

الله من هم قعد واستكنا= في داخل فواد شواه الحنيني

قصر رفيع وبالمراجل مبنا= ومجود اركانه وساسه مكيني

كل تظلل فيه ما خاب ظنا= القاصي الداني بعسر وليني

تشهد على ذلك سنين وطنا= الطيب تنهض له شراع متيني

كل العبارات البليغة تثنا= لو صغت معناها بعقد ثميني

قدام فعلك في ليال مضنا= دايم على الداعي تشير وتعيني

بالله يالمطلوب عندك زبنا= ياعالم مابين اخويه وبيني

يا ممن الروعات بامنك آمنا= يا فارج الشدات للمسلميني

تجبر عزانا فيه وبك استعنا= وتعظم اجري واجر منهو حزيني

واجعل منازله بجنان علنا= في رحمتك يا ارحم الراحميني

صلاة ربي مالزواهر بدنا= على نبي فاز دنيا وديني