غشيم قام بالبنك يترزز= مع التجار يجلس في عريشه

الي منه مشى قام يتهزز= تقل طاووس ينفش كل ريشه

بوسط البنك للذرعان غزز= يتابع سابك ومكه وبيشه

عصا قيله يمده ما تحرز= وخشمه بنفجه لو هو فريشه

ويشرب من عصير به مركز= ويسمع للتحاليل الغشيشة

والى تكا على الطرح المطرز= تقول مولع له رأس شيشه

والي مرك والي والله مقزز= سريع ما سمعت الا وشيشه

والي نام المساء ولا يفرز= يحلم بالرقوم المستهيشه

أنا مادري وش اللي به تعزز= غدا هامور والا زاد طيشه

بحسبنه العميل اللي مميز= بدا يجمع بطاقاته بخيشه

ونا خابره طفران يتلزز= على عيون الملا يسرج كديشه

على رجليه ما قام ايتعكز= مزوزي في مصاريف المعيشه

أمنول فوق ددسنه يتهندز= يطعّس بين غضراء والوحيشه

واظنه مع نزول السوق غرز= وطيّر كل جمعه وتحويشه

دخل مع باب مفتوح يتدروز= واظنه يقمز من اقرب دريشه

وكانه ما عقل وادرك وميز= نبي نمكع من الطبلون فيشه