مداعبة للصديق (أبو بدر الدهمي) من اليمن:

يابوبدر الدهمي وينك يا السنافي=ودّي أشكي لك همومٍ داخليّه
ضاعت الحيله وبيّحت الخوافي=واعنى من بيّح أسرارٍ خفيّه
لي شهر وأيام مانيب متعافي=أتقلّب كنّ بجنوبي صليّه
واشتعل قلبي وعجزنّ المطافي=لا يطفّن جمرةٍ بالقلب حيّه
والسبب خلّي تمادى بالتجافي=قفّل الجوال في ذيك العشيّه
صدّ عنّي واتركنْ وسط الفيافي=وما اذكر إني قد صدَرْ مني خطيّه
وانتفى نومي وكل الخلق غافي=بس أنا والليلْ ومعنا شاذليّه
أجرع العبرات واقنب بانكسافي=لين نور الصبح ما يطلع عليّه
حسبه الله كيف فيني ما يخافي=لا وقفنا عند خلاق البريّه
ليت خلي يوم شبَّ القلب شافي=وش جرى لي عقب صدّه من بليّه
وقبل ما اختِم في سجلات اعترافي=ودي أذكر وصف خلّي بالقضيّه
صاحبي شاعر ويفهم بالقوافي=والصحارى البيد يرعى به سِميَّه

وهذا رد أبي بدر:

مرحبا مليار في مليارصافي=من خوي بالوفاء يذكر خويه
مرحبا ياروح والهاجوس دافي=والحلايل جاتني لك معتنيه
جاتك بشعري وفني واحترافي=كل مانطريك زادت معنويه
وانت تزهاها لانك شخص وافي=والكريم نبادله دق التحيه
وادري ان الشعر ماهو شي كافي=بس يظهر لك من الخافي شويه
يارفيقي جيت وانته في مضافي=وابشر بعزك وانا راعي حميه
من جفاك اجفاه والدنيا عوافي=لايردك له حنين العاطفيه
خله يولي وتسفاه السوافي=بايجي غيره ولا الدنيا خليه
لا تهوجس له ولا تظهر خوافي=خل قلبك صامل ونفسك قويه
الجروح اتطيب والرحمن شافي=والنفوس الضايقه تصبح سليه
لا تقول ان غيرها قلبي يعافي=ولا تقول انها ولا وانها وهيه
ذي اثنعشر بيت جاتك بالتوافي=في العدد ياصاحبي صرنا سويه
والزياده مننا جاتك خفافي=بانزودها على شانك هديه
الدقيات الرقيات الرهافي=بيحن سدك وانا قبلك بهيه
رابيات العز ربات العفافي=كل ماراحت بنيه جت بنيه
الفيافي كم بها ريم الفيافي=وانت راعيها وفي ايدك بندقيه
قالها من طافها قبلك طوافي=والنصيحه حق لك واجب عليه
ياهلا وارحب وداري لك مرافي=والذبائح جاهزه لك مستويه
قرب اقلط من مراعينا هرافي =والله انا ما نقدم لك رديه