صدفه ورب البيت صدفه غريبه=وانا على ما قيل غافل لي الله
وبعض الصدف تجرح قلوب عطيبه=وترد للغالي زمانٍ تعداه
مدري ومثلي صاحبي ما دري به=نلعب على غي السواليف والآه
والصاحب الغالي تردى نصيبه=عامين تايه في مطاليب دنياه
اعلومه ابعادٍ ولو هي قريبه=من جيته والهم ياسم محياه
طلق الحجاج اليوم حاله امريبه=منحوت وإلا شين حظٍّ تولاه
مهوب ذاك اللي يضاحك طليبه=ويزرّق رماح المرح في حكاياه
يا ما ضحكنا عقب وقت المغيبه=واليوم ضحكه فارقنه شفاياه
والبارحه كلم وحاله تعيبه=يقول وشبك كيف تنبش بذكراه
أخاف يحسبنا نروم الشذيبه=نرقص على جرحه ونلهى بطرياه
ما يدري إن الوضع صدفه عجيبه=وبعض الصدف ما هيب ترحم ضحاياه
واللي تردى في غياهب قليبه=ما هوب مثل اللي يغني بليلاه!