بجو الليل روحـي مستهامـه=إلى عسعس على راسي ظلامه

يروقني ولـو ماكنـت رايـق=ويسري بي على وادي هيامه

يصور لي حبيبٍ عزّ وصلـه=وهو حَلْتَةْ عصا عني مقامـه

حبيبٍ من خفوقي في عيونـي=ذهابه جِيِئَتِه خلفـه وامامـه

ألا ِلله درّ ابــوك وامـــك=على هالإكْسِلَنْصْ وهالفخامـه

حبيبي والله انك نـور عينـي=وسحر القلب ومناه ومرامـه

تَفَرْمَتْ في يديك العقـل كلـه=وغيرتـي برامِجْـهْ ونظامـه

على شانك بدا ينْعَمْ قصيـدي=بعد ماكنت أقَصّه من تهامـه

تَحَول من غضب سيفٍ مُجَرّد=يناوش ذو العقال وذو العمامه

إلى جوري وتوليبٍ ونرجـس=وفُـلٍ واقحوانـيّ وخزامـه

يذوب القاف في خدك وقـدك=وموتٍ بين صدرك والبجامـه

وحورٍ كل ما سلهمـت فيهـا=بدت تِنْسَل من جسمي عظامه

ودارت وجه سبحان المصوّر=علـى غمازتيـن الإبتسامـه

مدامِكْ مُلْهِمَة عِرْفِه وحرفـه=فلا يِلْحَقْ مشاريـه وملامـه

ألا ياعين ابوي وعين جـدي=عسى عيني ماتبكي هالسمامه

ترفّقْ يابعد روحـي بروحـي=ودَلّعْها وتـال العمـر خامـه