يارب أنا وِصِلْت حَدّي مْن الْمَـادْ=مَن لي سِواك أصيح عِنده وانـادي
يارب أنا في حاجتك وانت عـوّاد=أنت الكريم اللي عليـه اعتمـادي
مَن تُضْلِلِه مالِه مِن الله مـن هـاد=ومن تُرشده يَسْلك طريق الرشادي
إرحم جَوَاي اللي حَرَم كبدي الزاد=لما غَديت مْـن الهـزال مْتَهَـادِي
يارب قِدّام افْتِضح بيـن الأجـواد=إفْرغ عليّ الصبر واربـط فـؤادي
تِعبْت واتْعَبْت الْقِرِيب مْـن الأولاد=اللي عليه مْـن النَجَابـه مبـادي
يَبْكي وِياخذني على جَنْبِ وِحْيـاد=وِيقول وِشْبك يايِبَه مانـتْ عـادي
صَارِح ولدك اللي لِوَاجِبْـكِ سَـدّاد=كَسّرْت قلبي كِـل يـوم مْتـرادي
وْتَعانِقَـنّ أعْناقِنـا حُــب وِوْداد=في منظرٍ يِبْكي عيـون الجمـادي
مايَدري ان ابوه "صيد امس" مِنصاد=وِمْعَلّـقٍ تَعْلِيـقـة الإضطـهـادي
مشكور ياقُرّة عيونـي والاسعـاد=ماجِبْتِـك إلا للأمـور الـشِـدادي
الله يامابي ونـا ابـوك وِش عـاد=مافي يَدك حيله لـو انـك مْفَـادي
ابـوك عِلاّتـه قِدِيمـات وِجْـداد=مْـن العِتـاق الأولـي والتـلادي
غِير الطعون اللي لها القلب مِلْجَاد=سرداد مِردادي صباحـي هَجَـادي
وين العهود الموثقة وين الأوعـاد=وين النقاء والصدق وين المبـادي
راحت هَبَا مُنْبَثّ . بالريح وابْـدَاد=واضْحيت في رَمْضَاي مثل القرادي
مِمَن نِقِيتَه بيـن غَضّـات الأنهـاد=نَقْوَة عيون الصقر وقـت الهـدادي
وانزَلْتَها في مِشّة الزور من غـاد=في منزلٍ قِرقـوف ظلّـه بَـرادي
سَنّدتْ في وادي وهي حَـدّرَتْ واد=وْلا تِلْتقي وِجْهَة حِـدور وْسنـادي
الله يسامحها على . الدال والصـاد=ويبيحهـا منـي بيـوم التـنـادي