لعيون من قال إكتب الشِعر واقراه =ممنون بكتب له وكلِّي سعادة
ليا بعد شعري ونثري ومعناه =وما سَطِّره فكري . ودمي مِداده
تعال. واكتب لك شعر لين ترضاه= وان كان ما تَرضاه ماني "حماده"
يفدى عيونك . من فرى القلب وادْمَاه =وكواه كيّ مْغْلّ واحرق فؤاده
فرّغْت له قلبي من اقصاه لقصاه =ماداج به مخلوق غيره . وْرَاده
يشهد علي الله ماخنت مبداه= وَلا الخيانة لي . ولاهيب عادة
وعطاني كتوفه ولقّا مقَفّاه =واصْبَحْت من عقبه طريح الوسادة
الله يبيحه مِنّ وْيسبِّع خطاه =ويحلِّلِه لو إنه أسْرَف زياده
من باعني يُرْبِح لِه البيع مولاه =والجرح لِه وقتٍ كَفِيل بْضَمَاده
ماكِلِّ من يِكْتَب بها الشعر يزهاه= مثل الرِّسَن مايستوي للجرادة
يزهى ذلولٍ يِطْرِب العين مَمْشاه =لَهَيجن الرَّكَّاب قامت تِمَادَه
إذنَه موسيقيه وعينَه تِملاّه =تَطْرَب لِقِيفانه وتدرك مراده
بنتٍ لِفَخرمْعَتّق الشعرمَدْعاه =تراقص إحروفه وينساق مَادِه
ماهو خسارة لَنِظَمْتِه بْشَرْواه =وتقلَّدَت به في نحرها قلاده
الشعر فنِّي . واعْزِفي لي موسيقاه =لين أنْطِرِب واسْمِعْك شِعر الريادة
شعرٍ بلا دافع . بِناقص بَلَيّاه =والله مايسوا حصاده رجاده