اسهر بداج الليل محدن بي درا=والعين من ضيم المودة تسهرى
ياطول ليل اللي يعد نجومها=ينباج نور الصبح ماذاق الكرى
ياحظ من عينه تغط بنومها=ماذاق ليعات الغرام ومادرى
متهني مع نومته في ليلته=ماولعه ذاك الغزال الاعفرى
يفرح بليله مايعرف الا الرقاد=وان طاف حزة نومته تكدرى
ماهوب مثلي شاقي في عندل=ضمرا هلاليه وطرف احورى
سبحان من له حكمه في من خلق=منشي من الصلصال زول اسمرى
بكباشيه كل يطيع بما تبي=سمع وطاعه ماتقوله للورى
ربي زرع ورده بقلبي مادريت=لين ابرضت بالقلب ورد احمرى
يارب يسر لاتعسر مطلبي=مفتون تدري بحالتي واللي جرى
عالجت صبري بس مافاد العلاج=ولا حصل وصل يباع ويشترى
يالله تبلغنا ليالي وصلها=هو مقصدي بالله والله اكبرى
والله لو الله واخشي العاقبه =لااسطي عليها بليل سطوة قسورى
اما نجحت وطاب كيفي واهتنيت=والا ظلام الليل يستر من سرى