انا اللي زاغ قلبي من نحيبه=ومن همي ومن هجر الحبيبه
لها هم لجي بين المحاني=تعذر عن مداواته طبيبه
سواد الليل يطويني وانا اللي =علي نجم السماء عيني رقيبه
تنام بليلها في لذ نومه=وانا دمعي علي خدي سريبه
اجاهد واتصبر واتجلد= واخفي مابي وحالي صويبه
تزايد لوعتي واوهام قلبي=وانا في حيها كنه غريبه
سكنا ديرة الفيحاء وعشنا=مابين الخشم ورمال كثيبه
وكني وارث مجنون ليلي =اصم ابكم ولا يسمع نديبه
وانا مااسمع ولايوحي نياحي=ونصح الناس مانيب اعتني به
تحداني زماني وامتحني =وثوبي مخطر من شق جيبه
امعافي والبلاوى عندي اكثر=تهددني وانا جروحي عطيبه
محني بالغلاء من كن وصفه=شعاع الشمس الي اقفت للمغيبه
جري هذا وانا مالي وسيله=اهاب النوم ونفسي مستريبه
صحيح ان المعني دوم شاقي= يجي يضحك وحاله مستصيبه
ترى هذى سياج المبتلينا=وعذري الهوى حموله تعيبه
وانا من عشقتي مليت روحي =ومليت الملا ومن لي قريبه
وحاولت اتسلي واتناسا=وانا ظني لي عزوم لبيبه
ولكن خانني ظني بظني=سرق عقلي حسيبي من حسيبه
نسيت الدين واركان الفريضه=ولا هو بختياري ذا غصيبه
ترى مايتفق في جوف واحد=عقول اثنين لاوالله صعيبه
تهاونت الهوى وارخيت دلوى=احسب اني الي مليت اجيبه
وقع قلبي علي حبل المنايا=ومن طاوع لها لزم تصيبه
لما اني صرت له مثل العسيفه=يقودن بالهوى قود النجيبه
تقفتني وقادتني وراها=هنوف عينها عين الربيبه
صحيت وقمت من غفوة منامي =ابي قلبي ولا انه كد سرى به
وقلت ارحم عسي يرحمك والي=معني بالهوى طال تعذيبه
سهينا والمصايب دوم تطرد= مريح القلب لين انه تجيبه