الدمع خزّنته وهذا يومه=حزني عظيم وحالتي يرثى له

والعين لو تبكي مهب مليومه=عمي وعمي في غلاه لحاله

راضين في حكمه وفي مقسومه=اللي خلقنا من عدم حنّا له

جان الخبر برسالة مشؤومه=لا عاد ذاك اليوم مع جواله

والناس من هول الخبر مصدومه=قامت ضحى الجمعه وهي مهتاله

يا كثر صدقانه وقل خصومه=حبّوه من طيبه وطيب أفعاله

ما هيب تبرد فاللزوم عزومه=الحمل لو إنه ثقيل شاله

من جاه يشكي فالزمان همومه=ما يرجع إلا والفرج يبرى له

حرٍّ بجو الطيب راعي حومه=ما ظنتي في هالزمان أمثاله

الناس في بيته قُبَل معزومه=ما هوب مثل اللي يجمّع ماله

كم من عجوزٍ وأرمله محرومه=عاشت بعزّه واتقت بظلاله

له قلبٍ أبيض من بياض هدومه=من عرفتي نفسي وهو يدعى له

يقوم في وسط الدجى من نومه=ما يرجي إلا خالقه وأفضاله

هذي تراها نبذةٍ بعلومه=يا قلّ من يمشي على منواله

مرحوم ياللي سيرته معلومه=بالطيب جعله طيّبٍ منزاله

يالله عساه من أمة مرحومه=وتستره في يوم الحشر وأهواله

وتقبل صلاته لك وتقبل صومه=وتقبل قيامه مع جميع أعماله