اسير الحب مثلي من غرام الحب ياويلـه = ثمان سنين لـذّة ساعـة بالعمـر فاقدهـا
على اللي كل ما مريت لوّح لي بمنديلـه = اشارة حب لكن البلى موتي علـى يدهـا
عسى ربي يعين اللي قضى ليله على حيله = نجوم الليل تال الليل من وجده يعددهـا
عليك اللوم مني ياقمر خمسة عشـر ليلـه = وش الاسباب روحٍ في يدك باتت تهددها
تهددني وانا مافي يـدي حـل ولا حيلـه = اعيش بحالة من سبتك هـذي حصايدهـا
لعل الرايح اللي بالسمـاء تسكب هماليلـه = تهل ايام والا النفس تحدى عن مواردهـا
الا ياكبدي اللي حرّها اللاهـوب عزيلـه = تريد الماء ولكن بـارد المـاء ما يبردهـا
تعلّق بالهوى ناسٍ هواهم بالهوى عيله = لو إن القاصره عيبه على راسه يساندها
قليل اللي يعرف اللي عليه ويفهم اللي له = كثير من البشر مثل البقر تمسك قلايدهـا

مما طـرى لـفـوادي * أبـدى بـذكـر الـبـادي = سبحان رب هــادي * عالم خفي الاسـرار
أسألك يـــــا رحماني * بـــالـعـفـو والغفراني =وان خف بي ميزاني * ان تجبرن يا جبار
ثم أشتكي لك روحي * ومصيبتي وجروحي = من عندل مملوحي * للروح شـوفه غـدار
شفته ضحي الجمعه * وأحرق بقلبي شمعه = ورجعت أهل الدمعه * لولاه مـا شي صار
كنيتها بضلوعي * وأضحك وانـــا مفجوعي = وأرجيه كل أسبوعي * يرمي لنا بالمسيار
يــــامن شغفني حبك * خف من عقوبة ربك = الله يـطـمـن فـلـبـك * حيرت قـلـب مـحـتـار
حيرت رجل الماشي * يـــا ريم توك ناشي = وأحرقت مهجة جاشي * حسبي عليك الستار
أقول لـك يــــا كـامـل * كامل بحسن الكامل= كان انك بقتلي صامل * فرحوا علي الاشرار
ارجوك تـرحم حـالي * لا يــاتـمـون عـيـالي =بعني الرخيص بغالي * وانـــا صديق عذار
ســلــم ســلام الـسـنـه * واجب ولا بــه مـنـّه = لا يــــــا طوير الجنه * حب الخفا لسعة نار
أحـرقت روح الشاعر * يـاللي جمالك فاخر = تضحك بوقت زاهر * ليش الفلك مــــا يندار
ان قلت سمع وطاعه * فالحظ شال شراعه = يكفين اشوفك ساعه * عن قطف كل الازهار

تعزيت اهوم الصبر والصبر ماطيقه=عيوني من الفرقى شقاها يلاحقها
الاياعيوني من طوى الهم والضيقه=الى اقبل سواد الليل هلت غوارقها
اهوجس ودمع العين جرّح طواريقه=كما تجرح الوديان جانب مضايقها
انا إنتل قلبي وانصرم من معاليقه=جزع وانمزع والروح شبت حرايقها
الاياوجودي وجد من قل توفيقه=غدى له ذهيب جرته مايعتقها
على جاهل كن الكواكب عشاريقه=تهاوى القمر والشمس من فوق عاتقها
عليه اشقر منقوض تسبح دواليقه=على نهده المركوز والنهد خانقها
الاواهني من صام وافطر على ريقه=شهر من زمانه عندها مايفارقها
شفى علتي شربة هنى من لواهيقه=اطفي بها كبد ضماها مخرقها
عسى مزنة من عصر تكشف بواريقه=عليها يحيل الطير من قو بارقها
تحدر على نفدٍ هوايه مشاريقه=جنوب الشعيب وشرقها الجال فارقها
تجي غبها الريضان تضحك زماليقه=حمار وبياض زاهيه جل خالقها
مداهيل عنقا يشكي الضيم عشيقه=يسومل وروحه عاصف الحب طارقها

الا ياعيوني ما يفيد النظر والشوف "=" تكافي وكفي لاتراعين ياعيوني
تكافي كفاك إمكايد الجادل الغطروف "=" ابو وجنةٍ فيها شرى الموت مقروني
انا اشوف شوفك واتمنى وانامشفوف "=" من اللي سلب عقلي على غير قانوني
غزالٍ يداني خطوته بين امان وخوف "=" يوطّي قدم رجله على القاع بالهوني
لحظني بعينٍ كن فيها نمش وسيوف "=" وقع ما بكفي واختلف وانصفق لوني
تبي ذبحتي ياريم وادي سكاكا الجوف "=" حسيبي عليك مصرف الخلق والكوني
تعرض غريبٍ نازحٍ يم ابن رفروف "=" ورا دار قاره يقنب الذيب من دوني
الاياعذابي منك ياضامر السرجوف "=" شبكني هواك وبيح الود مكنوني
الايازريف الطول انا اطلبك بالمعروف "=" بعد عونة الله منك انا برجي العوني
دخيلك تلبي دعوةٍ من ثلاث احروف "=" طرف ساعةٍ نفرح بها وانت ممنوني
اريح ضميرٍ بالهوا مولعٍ مكلوف "=" من الله خلقني بالغنادير مفتوني

الاياعيني اللي ما تلد بكل الازوالي=ولاتشبح وتفرح لين ترمق زول مضنونه
الايا لوعتي يافجعتي ياكبر غربالي=على غرو الى سلهم ذحاح الموت بعيونه
ذبحني بالهوى حبه وسمّ الجسم من حالي=قضى لي لاجزاه الله وزاد الجاش بطعونه
اثر كل العذارى مابهن من يرحم الحالي=الى شافن المولع بالهوى ماهمب ياوونه
الاياعاذلي لو قلت لي خلن على فالي=انا والنفس عند مخضب الكفين مرهونه
على ماراد يلعب بي وتل القلب ماوالي=كما تل الرشا طفق على المسنا يحدونه
انا بالشمس وانت ياوليف الروح بظلالي=خطا ماخفت من سبّح له الرعّاد بمزونه
الاياعين خرسا ماكره في نايف الجالي=انا وياك صرنا بالمثل ليلى ومجنونه
عليك العي كما تلعي طيور الليل عزالي=تفجّع بالبكا قلبي عليك وباح مكنونه
انا كيف ابا أصبر والغضي يطري على بالي=الاياويل من نفسه بعنق الريم مقرونه
انا عمّا مضى داله ولاابكي فرقة الغالي=ولكن ياعذابي حالوا اهل الترف من دونه
عسى من سبّب الفرقا وحاس بفقدي الغالي=عليلٍ كلما زاد المرض ردّوا يكوّونه

يقول الشاعر اللي ما يصور شن وهو وما صار "=" يجيب اللي يفيد المستمع من عدل الأمثالي
أنا باختار والرجّال باللي يعجبه يختار "=" ولاني منعدل يا هل المعرفة عن هوى بالي
الا ياتل قلبي تل سيمٍ تله الحفار "=" على بيرٍ صفاها يلطمه جالٍ على جالي
إلى من المكينة صاحب الصنعة عطاها النار "=" حداها اللي حداني والهوا للروح قتالي
على اللي تل مجدول مواقيمة ثلاث أشبار "=" على نهد زما فوق التريبة تقل فنجالي
حداني دونها حظ الندم وسط النهار إجهار "=" مشيت بيوم لوم ماتبي حالي ولا فالي
ألا ياحيلة الله كل مادار الفلك وإندار "=" تعرضّ لي نهارٍ يبعد الغالي عن الغالي
رمان بدار واللي شوفته موت وحياة بدار "=" احسب إن البطى يجلى الغلا عن كل رجالي
حبيبٍ ما قصر دوني قدم رجله عن المسيار "=" يواصلني وانا محتاج له ساعٍ ومرسالي
وأنا اسري له الى نامت عيون الحسد والهذار "=" أخاف اهل الحسد يدرون باحواله وبحوالي
عشير مايطاوع بي كلام الواشي الثرثار "=" وانا ماصخيه كان اصخي نهار البعث باعمالي
نعيش بصحبةٍ من يوم كنا بالشباب اصغار "=" وكلٍ ما يطيع بصاحبه واشي وعذالي
الا يالله يا ستّار سترك وأسمك الستار "=" تلبسنا ثياب الستر يارحمان ياوالي

على مايشوق لخاطري ينطق لساني=يعبر لساني لكن الوقت ضاهدني
عشقت الهوى واشقان يوم الله اشقاني=احسبه على حمل الموده يساعدني
رماني هوى قلبي وسمّن وعنّاني= وانا دون هذا كهرب الحب صايدني
مع الصاحب اللي في ضحى العيد وافاني=يقود الزعامه كن وده يعاندني
رميت السلام وفاتني تقل ما اوحاني=وهو يسمعن لاشك قصده يكايدني
الايابعد حالي وحيي وحيّاني=بلاش التغلي مد كفك وعايدني
ترى الكل غير الله رب القدر فاني=ولالك صلاح في حياتي تزهدني
الى جيت حادين الوحم حرق عطشاني=على مبسم غر ثناياه وردني
طرف ساعة شانك يوافق على شاني=اشاهدك وانته ياعيوني تشاهدني
تطفي لهيب شب بالقلب نيراني=ترى الكبد حرقه والمنيه تهددني
الايازريف الطول يانجل الاعياني=على حبك اللي غامرن لاتحاسدني
من العام قلبي من تغليك وجعاني= وزود الغلا ما هوب يبعد ولا يدني
حرام ان سلبت الروح وايتمت بزراني=عساها بحظك كان صممت تبعدني
نقضت العهود وبعت وديّ بخسراني = وغيرك من الخلان ما هوب فايدني
تذكرّ زمانٍ فات ممداك تنساني = ليال الصداقه واجب إنك تعاهدني

الايا ونة ونيتها من خاطر مفجوع=تهضم بالبكا والعين دمعه فوق الاوجاني
على اللي لاجزاه الله تعرض لي بلا منفوع=يبين اسهر وانا قبله من اللوعات سهراني
الاياهل الهوى من حين طرّاد الهوى ملقوع=يحصد البين مع طول المدى والقلب وجعاني
انا والله ماسيّرت قصدي ياعميلي طوع=ولكن مقصدي بمشاهدك يا خرس الاعياني
علامك ياثمر قلبي تلوعن بالهوى لي لوع=تعرض لي خطى ويلك من الله يوم تدهاني
زريف الطول مسلوب العواتق عودها مربوع=الاماأهبلك ياللي عن المجمول تنهاني
انا وياك يابدر الدجا عنا القلم مرفوع=ولكن لاتغلى تمحنن والقلب تعباني
سقى الله من سقاني من ثمان مزّها قرطوع=برد عن خاطري واطفى لهيب الكبد واحياني
وصلاة الله عدد ماهل وبل بارقه لاموع=على المختار ماغرد حمام فوق الاغصاني

بدا النقص في حالي بعد مانشغل بالي = رمتني عيوني بالغرابيل عزّالي
الا ياعيوني من جفا النوم والسهر =هواها البكا ودموعها تهمل اهمالي
وقلبٍ يلوعه عاصف الحب والهوى = لوع السموم لعشبةٍ في شفا جالي
وروحٍ مطاولها مرضها وتجحده=عن الناس مابا الناس يدرون عن حالي
اعزي هجوسي بين ربعي وعزوتي =وأنا خاطري كنّه على واهج الصالي
اسومل مع العالم وأخفّي مصيبتي = وأدافع صروف الوقت والهم يبرالي
سبب صاحبِ سمته وابشري معرفته=لو ان الثمن غالي انا شفي الغالي
اسومه بعيني وروحي ومهجتي =وأزيد الثمن بالمال مع باقي الحالي
حبيب بعد ماسمت وصله وباعني=تحسّف على وصله بالاول وبالتالي
من العام جارحني ومسقيني النكد = والى قلت عل الكبد من ريقك الحالي
ضحك بالثمان اللي تلاعج نضيدها = على مبسمٍ ذوب العسل بينهن سالي
يقربني و يبعدني ولا يقطع الرجا =واذا جيت ابشرب صك في دلوي الجالي
انا وش حياتي ياحياتي على الوزى = تشوف المرض وبحالة العزر ترضالي
حياتي وانا مقهور ياحالة الندم = عسى الموت ياخذني ترى الموت اشوالي
الا ياهلي وان كان حارجني القدر=عزاكم على الله ثم عزّوا بي عيالي
انا المبتلي في حب ملهوفة الحشا = عسى الله على بلواي مايحبط اعمالي
الا واهني ياللي من الحب ماشكى=يبات الليالي كلها خاطره سالي
ولا همّه اللي سرّ قلبي وضرني = يورين لين ومقصدي ما تهيالي
الي جيت يمّه هدني ثم ردّني = وأعوّد وانا مقهور شكواي للوالي
أنا اللي عيوني كل مايظلم الدجا = أحسّب نجوم الليل من ضيقه البالي
اسهر الي نام المعافا وعلّتي=لجت في حنايا القلب والحب قتّالي
اجاذب ونيني لا تخاليت بالخلا=وأطوّح ثلاث اصوات في صوتي العالي
انا اللي قضالي نابي الردف والنحر = ولا فادلي حتى ولو ارخصت له مالي
الا يابعد من لي حبيب من الملا = متى يا زريف الطول تعطف على حالي
تدارك حياتي يا حياتي من الدرك = ترا الروح طيرٍ ينحبل وانت حبّالي

الاياقلبي ياللي كل ماجا الليل جاه خلاج=يلوج ويلتوي بالجاش من شي تورجله
اعاني من عنا جرح خفق بين الضلوع ولاج=عرضته للطبيب اللي مدحتوا ما تخرجله
دريت ان الهوى يرث جروح مالهن علاج=الى زاد الغلا واللي توده قاصر رجله
يخاف من العيون الشامته واكذوبة الهراج=الا جا الصبح هراج القفى يكثر بنا دجله
انا بصبر عسى بالصبر لو طال الفراق افراج=على شانك وغيرك ماسهرت الليل من اجله
على شانك ومن شانك حياتي بالحياة احراج=عسى قلب شبكته بالهوى ربي يفرج له
تكايدني بخد مادرج من فوقه المكياج=طبيعي الجمال اللي غشى الوجنه هدب نجله
عليه ثلاث نجوم وزودوه من الحلا بالتاج=زعيم الحسن له حق الجمال اللي يتوج له
الايامجيب دعوة من دعاك بليلة المعراج=دعاك بجاهك التخفيف تقبل طلبة عجله
تعاوني على خل تركني للشقا مسهاج=ثمان سنين من عمري وانا مرهون في سجله
اعوم بغبةاوهامه لما ساقتني الامواج=على شط الفرات ايام وايام على دجله

آه من ونةٍ هجت على القلب طاقة "=" حين جريتها دمع النواظر سبقها
بس اجاذب ونيني بين سجة وفاقة "=" لا تلومون سهر العين مما طرقها
ياهلي لا تزيدون المصيبة إلحاقة "=" كل روح تروح بدبرة اللي خلقها
ماقدر أصبر على شيٍ تعدى نطاقة "=" إلتمس بالظفيره سلك ماص وحرقها
رحت يم الطبيب وقال مابك لياقة "=" لين سودالهشيم الصبح يبرض ورقها
لو _كمال_ إجتهد وأجرى فحوص ادقاقة "=" ما لقى اللي يسم الحال حتى سرقها
ويش اسوي بروحي يا وجيه الرفاقة = وان تشكيت روحي هاجسي قال سقها
سقتها للهلاك وزاد شوقي شفاقة "=" أشهد إن المودة ما تسبع رفقها
خابر علتي والبيت ستره ارواقه "=" ماتشكيت لين الدود حالي لحقها
علتي من غرير زاد حملي وساقة "=" معه شلفا ذياب إلى نطحني زرقها
يازعيم الحلى والمعرفة والرشاقة "=" لاتحسدن حياة عيشتي من عرقها
خل عندك حنان وخل عندك لباقة "=" لا تسبب على الروح البرية غرقها
لك محبٍ يحبك ما تبيله صداقة "=" ليه أنا أبني الصداقة وأنت تهدم شنقها

الايازول زولك زلزل العقل الرزين وزال=دخيلك يامليح الزول لاتستعمل الزودي
ابشرح لك سراير حالتي واشكي عليك الحال= وانا يوم اشتكي عيني بلاها عيونك السودي
اجاحد من ثمان سنين وارجي كل راس هلال=عسى برضاك تجبر خاطر بالحب ملهودي
صبرت وطال صبري والموده تذبح الرجال=ولاحصلت مع زود العنا شفي ومقصودي
طلبتك بالرضا والا الزعل ماله معك مدخال=علي الباب باب المنفعه مقفل ومسدودي
انا لو قلت ابسلى عن مجالك مانسمح لي بال=تحاسدني هواجيس العنا ياناعم العودي
الى صديت عنها بالخلا جاني رهق وجفال=والى قابلتها جذت من اقصى القلب عرجودي
عسى رب بلاني فيك يافتان ياحيال=يلينك مثل مالان الحديد بكف داوودي

قال الذي وسمه على الكبد عرقات "=" وسمه جديد ولحقوا به عراقي
يابوي انا شيبت والنفس مغرات "=" والعين تشرف نايفات المراقي
ماعقب عشرين السنه صبر واسكات "="دير النظر يمي ترى القلب شاقي
صبرت انا والقلب حاديه ضيقات "=" واليوم انا ماعاد في انفهاقي
شفي على اللي عند اهلها مخبات "=" اللي حليه ما رتع بالمتاقي
له قذلةٍ فوق الردايف مغذات "=" ينثر عليها الطيب بين المشاقي
هاف الحشا كنه عن الزاد معطات "=" وسيطها مثل الهلال متلاقي
وجدي عليها اليوم والعمر مافات "=" وجدي عليها اليوم والعمر باقي
وجد الذي له خمس مع خمس خلفات "=" ضاعن حلال القوم بين الطراقي
اصبح على ماقيل يرمي بالاصوات "=" لو دور المسكين ماهب لاقي
يالايمي جعلك كسير بمضمات "=" كسره على حد النحر بين التراقي
هذا الجزا وختام قيلي صلوات "=" على الذي بالغار كافله واقي

كل ما قلت ابسلى عن هوا كل غالي "=" ساقني سايق العاشق بحنوة عصاته
ودي اسلى وانا ماني عن الحب سالي "=" لو هوى اليوم مره زايدٍ عن حلاته
ياهل الحب ماللحب دور ومجالي "=" مابقي للهوى ناس تميز صفاته
من تحلم وغنى قال يا همّاللي"=" أثري الشاعر اللي ما تسوّى سواته
وغيره اللي يحسدون البنات الجمالي "=" يالله انك على طبعه تحسده حياته
الشعر ذيل خيل ولابس كعب عالي "=" فاتحٍ دلعته ما تفرقه من خواته
ياحمد يامحمد دوكم اللي بقالي "=" ويش لي بالغرام اللي نزعتوا طراته
يوم صار الهوا سعره بسعر الريالي "=" مات والدايم الله كفنوه بعباته

وجودي وجوداللي جذب ونته واشتان=بعد ما وقع وافلت يدينه عن الطاره
قلب موتره بالقيظ في حومة النقيان=صميله وهو ظامي على الباب مطاره
فزع للهمل بالقايله والقدم حفيان=تعب وانقلب يبكي على شوف سياره
عرض له حلال القوم طفق من القعدان=جفل ساع شافه يوم حظه طفت ناره
يبي نقذة للعود والعجز والورعان=يدير الروابع والهواجيس محتاره
قعد بالخلا لامن صميل ولاحذيان=صفق بيده اليمنى من الوجد بيساره
سجد ركعتين وسلم امره الى الرحمان=كفى يامكافي والمقادير جباره
بعد مانصرم نصف الشهر جابوا الرعيان=خبر ميت بين الطعاميس والقاره
لقوا جثته ثم اشعروا بالخبر سلمان=وقال ابعثوا يكشف على النفد طياره
انا صابني مثله من الهاتك الفتان=طلبته بصلح وشنّها امس الضحى غاره
انا وش حياتي كان ابصبر على ماجان=معك حق تلعب لعبة الفرد بالشاره
زماني وانا اراعيك عن جملة الخلان=وافوضك تاخذ جوهر القلب واسراره
عسى ربما ترحم وتعطف على الوجعان=على راحتك تسمح من الورد نواره
اطفي فواد تشتعل جوفه النيران=ولو حبة بين العشاريق وزراره
احلّلك وادعي لك من الخالق الغفران=الى انقذت روحي من شقى الحب واكداره

اه اناشدك يا شمعة حياتي و ودي =اه اناشدك يا كل الفرح والسعاده
اه انا شدك عن دمع جرى فوق خدي=كل ما شفت زولك .... زولك الدمع زاده
اه انا شدك يا محرق شرايين كبدي= الخطا والتعمد منك ما هوب عاده
اه انا شدك عن قلب نفذ منه سدي=شاله الحب لين انه حبل له وصاده
اه انا شدك ياللي تطعن الروح عمدي=كن مالك على روحٍ تودك جلاده
اه انا شدك ياللي واصل منك حدي=اشهد ان الهوى والحب ساس القراده
اه انا شدك عن زود الفزع والتحدي= ليه تخطي بعد علقت تاج القياده
اه انا شدك ياللي غارق فيك وجدي=قبل تاخذ على الزينات نوبل شهاده
اتصبر عسى لي غيب الايام تبدي=واصبح الذيب يجفل من ظبي الحماده
لانطحني بديت اقرا من الخوف وردي=واطلب الله يجاهد من عسرني جهاده

آه يا عيني اللي كل قمرا شهر "=" تسهر الليل كن بحاجر العين شوك
أتصبر ولا أدري وش يجيب الصبر "=" وأدفع النفس للعزة وحسن السلوك
ماقدر أصبر ولا أعطي من نشدني خبر "=" أبعد الحوم لا تطلى علي الشكوك
أتوجد على وردٍ بياض وحمر"=" إنتشله الزمان وشطره عن تبوك
حسبي الله عليهم كل مطلع فجر "=" احسدوني هواي وراحتي واحسدوك
يا هوى الروح ما تعمل جميلة وأجر "=" الله انه بلطفه يرحم أمك وأبوك
ارحم اللي من أسبابك حياته خطر "=" يوم حل الفراق وسافروا وأبعدوك
واحسايف حياتي كان راحت قهر "=" والقدر ما دفع يومه رصيد البنوك

الا واهني اللي من الحب مايهتم=يطيب الزمان ويختلف شين ماهمه
معافى زمانه لايهوجس ولايندم=يقضي ليال شباط والقيظ عند امه
وانا اللي عيوني تزعج الدمع دمعه دم=واخفي جروح الروح والروح منسمه
سبب جاهل لاهوب يصخف ولايرحم=لو اني من اقصى الناس والا ولد عمه
حربني وانا ماني بطاغي ولامجرم=انا بالبخت ياهافي الوسط والذمه
الى صار دينك جايز ذبحة المسلم=فالى حل ذبحي خل ذبحي على يمه
الايامربي قذلة تقل ذيل ادهم=من العنبر الغالي على بعد له شمه
ابي شربة تبرد غليلي من المبسم=اذا كان تسمح لي على مطلبي تمه
صويب الموده لو نجح دور ما يسلم=يسومل على همه وهو ناشف دمه
ياليت الثريا ماعترض دونها المرزم=لما الكبد يطفي حرها بارد الجمه
حرام الهوى غيرك من الناس مايلزم=الى صرت غيري ماتلد النظر يمه

مانيب مسير بعد خلي على الحاره=
دار جفت لي حبيب عفت مسياره=
خلي غدوا به هله يابعد مشواره=
جوله بعاد النحايا واقلعوا داره=
امني النفس رد الحول بزياره=
ياكودي ارتاح وانسى الهم واكداره=
كلن على قد فعله تذكر اخباره=

يقول المولع اللي شال حمل كبر قصر خزام=ثقيل باهض حمله على راسه يزوزيبه
يقوله مغرم نومه حريبه يوم كل نام=الى جت حزة الهجعه جزت عينه من اللي به
يلاع الورق في نوحه وكثر النوح صار هيام=فجعني وانبرح سدي وقلبي كامينٍ غيبه
يمرن المها عندي وانا اخايل تقل مرسام=سبب مالي بهن لفته وطرد الغي مالي به
الا يالله يامحصى الليالي محصي الايام=تحل قياد ماسور شذب قيده عراقيبه
طريح بالحسا جسمه وقلبه مع هل الدمام=على ساقة هوى عينه هبوب الريح تجري به
الاياهاجسي هوّد ترى ماطاب لك مادام=عواكيس الدهر حلت يديه من مقاضيبه
بكينا لين ملينا وعين الولف ماتنلام=الاياويل من قلبه على ربعه فرى جيبه
يلومن واحد يضحى الضحى من مرقده ماقام=هبيل ماشي زوله على ماقيل والخيبه

سقى الله من الضاحي لما وادي العمران=حقوق دفوق من العشا ضافي فوقه
الى زل سبع من الدجى ساقه الرحمان=رعوده تحلتم والمشاعيل ببروقه
على مقطر الساقي مع القصر والريضان=ثلاثين يوم الغرس والنقع بعروقه
مداهيل عمهوجه شعتني وانا مشتان=وبيح خفاي بحسن خلقه ومنطوقه
الى شافني هلا وحلف ثلاث ايمان=بلهجة موده كان الايمان ماثوقه
اخاف اندفع واصبح أبحر الهوى غرقان=كما ان الهوى راعيه مايامن البوقه
اشوف العنب والخوخ والتين والرمان=والى جيت ابا العنقود ردون لااذوقه
لك الله ولولا الله واداري من العدوان=فلا اخذ ثلاث ايام عن قطف زملوقه
غرامي بشقر من ندى المسك والريحان=تجلجل على بيض وعقد على طوقه
اسولف مع الجهال واضحك وانا وجعان=سبب شمعتي من شمعة البيض محروقه
حلا ماتشوف من البني عودها مليان=حلايا عنود باشهب الملح مصفوقه
ثمان على المبسم بها الدر والمرجان=كما دانة من بحر تسعين مفلوقه
حرام ان خطفت الروح ياقايد الغزلان=وقلبي من اول يوم جذيت معلوقه
ترى ذبحة المسلم بلا ذنب يافتان=لها حوبة ماهي عن الخصم مفهوقه

على شارع الحله وانا اراقب الفله=عرض لي عساه الخير من ياسم العرقات
على كبدي اللي تجحد الغيظ والعله=كواني وخلاني عليه اجذب الونات
تقبل مغيب الشمس يمشي على ظله=ضحى والضحيه منه انا طحت بالمثنات
حدث بي عقب مااقفيت يافاتني خله=الاواعذابي منك ياشمعة الزينات
انا اللي عيوني تزعج الدمع وتهله=جرح خدها اللي حدها تزعج العبرات
غزال تغطرس بالحلا والغلا كله=يسوق المنايا سوق ويتابع الغارات
تجزل بها اللي بالحلا محسن دله=عذاب العيون عيونه اللي كما الساعات
الى اقبل يداني خطوة الرجل ويتله=اقول الحياة اللي بقت مالها لذات
اقوله وانا ياغافر الذنب والزله=ليال الشتا قزرتها هاجس واسكات
احسب نجوم الليل واسهر على الدله=فريد وحيد شاب راسي من اللوعات
الا واهني من ناعم العود مصخ له=ارفه على نفس طنت من زمان فات
ورى ماتعاملني على الدين والمله=حرام عليك ان مت مقهور مع من مات

ياليل الشتاء ماطولك ياليل يامبطاك =على اللي عيونه ماتبا النوم من تالي
متى تنجلي ياليل والصبح فيه افلاك=ابا رمي السبب وارجي السعاده من الوالي
تغليت ياغالي وسيرة غلاك اغلاك=على مامضى تستاهل اغليك ياغالي
انا اغليك ياللي سيرة الحب ماتخفاك= تعرف الهوى وتميز المرّ والحالي
انا اغليك يا للي ما تعشقت ذاك وذاك = ولاصار لك بين العرب رد وابدالي
انا اغليك ياللي كل ماهب لي طرياك=لو انك بعيد الدار دايم على بالي
اجاهد هوى نفسي على رغبتك ومناك=ولااطيع بك واشي ولاهرج عذالي
عسى ربما يامن صنعك الولي وانشاك=تميز على شقح البني باربع اشكالي
تميز بعين وعنق ومبيسم فتاك=وعود يميل مع الهوى حيث مامالي
حبيب لبيب لعن ابو خاطر ينساك=لو انك تغلى والغلا سامر حالي
حرام الهوى ماتبع طريق الهوى لولاك=ولاالفت نظر عيني على كل الازوالي
دخيلك ابجاه اللي على رغبته سواك=لما ادعاك مثل سهيل بالماكر العالي
على قيس ماكلفتني تشملن حسناك= وانا سمحٍ يا زين باللي تورالي

عيوني تهل الـــدمع مما حصلها=رماها الشقى لين ابتلت واستحلها
تصرف بها يوم انها مــــا تصرفت=والى قلت عيني قال خله لعلها
الاياوجودي وجد من راغ وانصدم=تكسرعلى الرجلين وايدية كلها
صفقة الغشيم اللي له ايـام ماصحى=مشى مندمغ ومصيبتة ممهل لها
فزع موتر الاسعاف من وصلة الخبر=على نية الحروة وهو ما يدلها
سرى تسمع الونان يدوي مع الخلا=تعدى مكان الحادثة مافطن لها
بعد ما اصبحوا وجوله والى حالة الوزى=جميع القوايم مابه اللي يقلها
خذواصورتة وادنوا له الشاش والنعش=معيف من الدنيا دقاقة وجلها
بعد ورضوه بساحة الجمس وانكفوا=زعج له ثلاث أصوات وأقطع بحلها
توفى ووافى الله وانـا حي للشقى=اكايز همومي ليت ربي يحلها
على اللي سلب عقلي وروحي وحدني=أوطي لها روحي وأهينه وأذلها
أهينه وأنا ما ارضى لغيـــره يهينها=ولاكل من شافت خياله هوا لها
أهينه لمن ركز غــــلاه ومودته =على رغبة مني وأنا جايزلهــــــــا
واهينة لشــقرسابحات على النحــر=على طيب دهن العودشقره يعلها
واهينة لرمـش شـارع فــوق وجنتة=بعدخف دم وهرجة ما تملـــــــــها
الى اقبلت تمشي تحــايلت زولــها=تقول الله الي بالهوى صافط لـــها

يا مغادر بلادك رافقتك السلامه = لو فراقك على روح تودك فجيعه
ما على العين وان طاول سهرها ملامه = أشهد ان الفراق الصبح شوفه شنيعه
ابعدوا به وصار الهم لي والندامه = اطحن الغيظ في كبدي وكبدي وجيعه
ابعدوا به وحظي منه ما ادرك مرامه = لا شربنا غدير ولا رعينا ربيعه
كيف ابسلى حبيبٍ ميّتٍ في غرامه = كل ما جابه الطاري عليه هزيعه
لا تلومون من عينه جزت عن منامه = ما على الزين ياهل الزين نفسٍ رفيعه
يا عفيف نزيهٍ ما ينزّل مقامه = عنده المال غالي والشرف ما يبيعه
بس حلو اللسان ومعه شبه إبتسامه = يطعن القلب برموشه وعينه وسيعه
يا مليكة جمال الحسن فيكم وسامه = وان بدا رد من بعض البني ما نطيعه
أنت سيد البني حتى تقوم القيامه = حامل صك من ريّس قضاة الشريعه
وانت من مركز الزينات تاخذ علامه = بالحلا والرشاقه والحيا بك طبيعه
ودي أبعث جواب ولا آثق الا حمامه = واثق ان الحمامه سرنا ما تذيعه
أتطمن عليك وخيرة العمر خامه = موجبن لك قصور بالضماير منيعه
والله اني ما اقول الياس منّك إختامه = أترجاك دور اليوم والا تبيعه

عز واليك يا براق غر المزوني = غيبة الشمس براقه يلهله شعاعه
يسجع الطير ويردد عليه اللحوني = مرهي بالحيا عقب المحل والمجاعه
آه انا المغرم اللي داميات اطعوني = علتي ما يحللها طبيب الاشاعه
الله اقوى الا جا الليل كثرت اشطوني = كن بيني وبين النوم حرب وقطاعه
يا هني لو هلي عصر الجهل عضبوني = يوم انا جاهل سني بسن الرضاعه
عضبوني عن اللي من سببهم عيوني = من ليال الشتا ما هملجت ربع ساعه
انت الاسباب ياللي حيل دونك ودوني = كيف ابا اصلك ياللي معك روحي وداعه
انت ودك وانا ودي واهلك اعسروني = ليت حظي وحظك يرفع الله اشراعه
دام قلبي يحنّك وانت قلبك حنوني = يا حليل الغلا المستور حب وشفاعه
والله اني ما خون اللي معي ما يخوني = واجد الزين لكن ماش غيرك اطماعه

اودعك يا بدرٍ ظهر له زمان وغاب = اودعك يوم ابعدت نورك عن الديره
اودعك يا بدر سرا والهوى ما طاب = عليه العيون الدمع جرّح معابيره
اودعك لجل الحب مع نورك الجذاب = هويته وحبيته ولا شاقني غيره
وداعتك روحي يوم جابه لك الجلاب = جلبها الغلا والحب هذي تدابيره
ترا البعد ما يمحى غلا من رماني وصاب = رماني بسهم قاتل يالله الخيره
ضربني ودم القلب ينزف من المضراب = وذا مكسبي زود على الذعر والذيره
الا يا عيوني والله انك من الاسباب = كسبتن لقلبي جاهل ما حسن السيره
تصبرت لين الصبر بيّح خفاي وذاب = عليكم من الله راعوا الحق والجيره
قضى العمر منكم ما حصلي فرح واعجاب = ولا صح لي غير التعب منك يا ميره
أميرة جمال الحسن تخضع لك الارقاب = عذاب القلوب الهايمه حد ازاريره
الا يا هلي حطوا لقلبي حجا وكتاب = الى صار شفّ النفس شره طمس خيره

حبيبي كل ماجيته وداعبته ولاويته = تعذّر لي على الوجه الصحيح وقال ما ودي
انا ودي وكل الود ودي بالفرح نسعد = اشاهد منك يا مشهد حياتي منتهى وجدي
اشاهد منك يا روحي عجايب هرج ومزوحي = عليه القلب مجروحي ودمعي جارح خدي
انا وشلون يالغالي يطيب وينسمح بالي = وحبك سامرن حالي حرام الهجر والصدي
حرام انك تكلفني زمان ولا توالفني = على ذا الحال شايفني مريض واصل حدي
انا ممنون من شانك على سيتّك واحسانك = ولو ما قلت بلسانك اقوم بواجب يبدي
عساي احظى بتوفيقك واحوز ارضاك عن ضيقك = واطفي من شهد ريقك لهيب ساعرٍ كبدي

مبسوط حالك ضحى عيدك = وانا ضحى العيد مجروحي
تلفح بشقر ٍ على جيدك = لو ما تبرجت مملوحي
ياللي تغلّى وانا اريدك = ماقوى العزا عنك يا روحي
روحي معك خاتم بيدك = وانا لي السهر والنوحي
من جور ضيمك وتهديك = حيران ما اجلس ولا اروحي
تعال افاهمك وفيدك = ما هي سواليف و امزوحي
ضريت حالي بتنكيدك = عن هالعمل ما انت مسموحي

عفى الله عن قلبٍ شكى والسبـب عينـه = شكى وإشتكى و الناس ماترحم المصيوب
تراك السبـب ياعينـي اللـي تورينـه = تورين قلبي وأحرقه حامـي اللاهـوب
ألا ياوجودي وجـد مـن غرقّـه دينـه = عليـه الديـون العـام ثلثينهـا مقلـوب
على جاهلٍ يمشـي دلـع شايـفٍ زينـه = يفوق البنات و سنهـا غايـة المطلـوب
صغيرٍ غريـر الحـب يجهـل قوانينـه = قصاني على حدي وأنا ماعلـيّ إذنـوب
غزالٍ غزانـي جعلهـا فـي موازينـه = رماني و أنا عابرسبيلي مـع الشلهـوب
أنـا كـل ماطالـع نـوايـع بساتيـنـه = وإلى كل دانة بالبحـر دونهـا شـاذوب
أجاوب حمـامٍ معجبـن مـن تلاحينـه = يجرّ اللحون و يفجع الخاطر المتعـوب
ألا و اعذابـي جرحتـنـي سكاكيـنـه = ولا ينشكي فعله على الشرع والمنصوب
عسى الله يقود الولـف بينـي و مابينـه = أطفي ضميرٍ فيه فرن الهـوى مشبـوب
ألا يازريف الطول ويـن العهـد وينـه = عليّ الشقا من يوم عرفي معك مكتـوب

من شان عينك يهل الدمع من عينـي = يا كثـر دمـعٍ علـى فرقـاك هلّيتـه
مالي حبيـبٍ علـى الغايـة يسلينـي = إلا أنت ياللي ملكت القلـب وأشقيتـه
ولعتني بالهوى مـن شـان تشقينـي = ياما و يامـا مـن الغربـال عانيتـه
حبك جرحني عسى ربـي يشافينـي = غيرك من البيض و اللّه مـا تمنيتـه
مسكين راع الهوى و الحب مسكينـي = يبـي المروفـه و لكنـك تحديـتـه
الحب حاديني لك و أنـت متحدينـي = و أمسيت سهران لين الليـل سرّيتـه
كم لي و أنا أرجيك يا شمس المزاييني = اللّـه يحقـق رجـا وصـلٍ ترجّيتـه

آه ياللي رموش إعيـون عينـك خطيـره = مثل شلفا ذياب و مثل سيـف العواجـي
غارسن لـك بقلبـي خنجريـنٍ شطيـره = لـو تعالجـت عنهـا مايفيـدن علاجـي
حبك اللي حرقني مثـل حـرق الظفيـره = يلسع القلـب لسـع الكهربـه البواجـي
ليه يابو شعر شقـرٍ إشناحـيٍ ضهيـره = تكسر القلب الأبيض كسركـم للزجّاجـي
جاهلـك فيـه ربٍ عالـمٍ بالسـريـره = عالم اللي بدا وأبدي عليـك إحتجاجـي
أمس كلن يعـد اللـي يلـوج بضميـره = بالجن لي إحجاجك مثل ما بلج إحجاجـي
راحـت أيـام مـا كنّـا قطفنـا مسيـره = و إنتهى اللي بقى من لذّتـي بانزعاجـي
والله إنـه مصيبـة و المصيبـة كبيـره = كدّر الله مزجـاك يـا مكـدّر مزاجـي
ليت كلن يـروح بـزود شـرّه و خيـره = لاتفكر تراي أنساك و أعـرف خراجـي
إستر اللي مضى و اللي بقـى لا تثيـره = كل ضيقـة بعدهـا سجـةٍ و انفراجـي
همّتي فـوق فـوق و مهجتـي مستنيـره = ما قعـد بالربـوق إلا عيـال النعاجـي
كل صقّار يدرك ويـش طلعـات طيـره = و أشقر الريش ما وقّع بعـش الدجاجـي
حـلّ عنـيّ تراهـا الأولـة و الأخيـره = جعلها هفّة اللـي طـار ليلـة عجاجـي
بعد غيّرت رايـك قلـت بالأمـر خيـره = بعت وصلك وحبك وسط سوق الحراجي
ماأنت مني قريب و لا أنت لي من عشيره = لا تفكر ترى ماني علـى الحـب لاجـي
كـم غنـدورةٍ يـوم الهـوى مستديـره = طفت معها مطاف ولا حصلي احراجـي

ألا يابو ثمـانٍ لاهقـة حبـك بـرى حالـي = أنا لولاك مالي فـي طواريـق الهـوى نيّـة
عيوني غير زولك مـا تلّـد بكـل الأزوالـي = ولا كن ما بقلبـك ياصخيـف الـروح ماويـة
تشوف إنـي مريـضٍ لاجلـك و اترضالـي = تكايدني وأنا مالي جـدى إلا الصفـق بيديّـه
لو إن اللي ضهدني ضاهدك يالجوهر الغالـي = لـك الله ماتنـام الليـل و عيونـي شقاويـة
تناظرني بعيـن الغيـظ مابـه رد و ابدالـي = كما إنـي مـن بعيـد النـاس مابـك محنّيـة
ألا ياروح روحي لاتجّـذ الوصـل بحبالـي = تجمّل بي ترى الحسنى تضاعف عن مية سّية
دخيلـك ياعيونـي لاتعذبنـي علـى الخالـي = تراني ما طلبتـك بالهـوى طلبـه معسريـه
أبي منك المواصل ياشفى روحـي و سلاّلـي = ترى نفس الفتى يالزيـن مامـوره و منهيّـة
تمنينـي ولاكـن لا طلبتـك مــا تهيـالـي = عسى ربٍ صبغ حبك بقلبـي يصخـرك ليـه
وألى منه لحظ لمي بنجـلٍ تغـزل اغزالـي = لو إني مع طريقي سمّـرت بالقـاع رجليّـه
ألا ياهل الهوى جرح الهوى للـروح قتّالـي = ولا يبرى صويبه لو رقـم كيـة علـى كيـة

قـال مـن حسـب الساعـات و أحصـى الدقايق= سـاهـرٍ لـيـن هــرّاف النـجـوم أدبـحـنـي
ياحمـد بـاح سـدي والحشـى بــات ضايـق = ضيـقـةٍ الـلـي عيـونـه بالـوجـع يسهـرّنـي
آه و اجرحـي اللـي فـي حشـى الـروح خافـق = بيـن عــوج الضـلـوع المهـدفـة مستكنّـي
كـن جـو الضمـايـر يشتـعـل بــه حـرايـق = مــن لهبـهـا معالـيـق الـفـواد أحـرقـنـي
يالله اللـي عـلـى غــرات الأســرار وايـق = طالبـك يــا إلاهــي تقـبـل الـعـذر منـي
ياحـلـيـمٍ كـريــمٍ عــالــمٍ بالحـقـايـق = أستعينـك علـى الـلـي صابـنـي و إمتحـنـي
جـادلٍ تــلّ قلـبـي تــل سـيـر السبايـق = هيـلـعٍ شــاف جــولٍ بالوطـا يدرجـنــي
ماذبحـنـي سـواتـه مــن جمـيـع الخلايـق = غيرهـا لــو يـجـن الـحـور مــا ولعـنـي
جايـر الزيـن فاخـر كامـل الـوصـف لايــق = مـا بجيلـه مثيـلـه جـوهـر البـيـض فـنـي
الـردايـف عليـهـا الـثـوب غــادٍ طرايـق = وأشـقـرٍ فـوقـهـن مـنـقـضٍ و امتثـنـي
قبـل شــوف العـواتـق و النـهـود اللبـايـق = دالـهـن مستـريـحٍ خـاطــري مرجهـنـي
لـو طويـل الجديلـة مثـل مـا ذقــت ذايـق = مالـك الله يـصـدّ و يقـطـع الـرجـل عـنـي
ياعريـب المجـانـي عاقـنـي عـنـك عـايـق = كـل مـا جيـت أبمشـي قيـد رجلـي شطنـي

يقول اللي تعالـج و إمـرّض و إنعمسـت افكاره = بلعت من المصايـب ياحمـد ليـن إنفـرى جيبي
عفـى الله عنـك يانفـسٍ طنـت ماهيـب جـوّاره = طناهـا مـن ليـالٍ مــا فجتـنـي بالتحاسيبـي
أنـا نفسـي مـن العـادة علـى الشـدات صبّـارة = فـلا كـن الليالـي مـن خطاهـن لايحـن شيبـي
ألا يامـل قلـبٍ راح لسهـوم الـهـوى شــارة = تدالـنّـه عبـاريـدٍ عطـيـبـات المظـاريـبـي
رمانـي واحـدٍ مالـه إبذبـح الـروح و ش كـاره = يحسب إن ماواري أحدٍ إلـى أتلفنـي يداعـي بي
يبيـن ألعـي علـى فقـده سـوات إمـدوه القارة = وأنا ضليت من قبلـه بديـت أقنب كما الذيبي
ألا يالله ياكافـي بــلاوي الـوقـت و أخـطـاره = أنـا بحمـاك ياربـي تـهّـيلي مطاليبي
تعاونـي علـى خـلٍ بـدا شرّه علـى جـاره = حـدان بسيفه الصـارم يبتّر بــه عراقيـبـي
أنـا يـوم الهـوى خـضـرٍ نبانيـبـه و نـواره = جنيت مـن الثمـر مـازان ماحـيٍ قـرى غيبـي
فلا كن يوم شان الوقت عفـت الـورد و ازهاره = لـي الله قايـمٍ بالقصـد عـن خضـر النبانيـبـي
بعد ما أبديت له سري وهوما أبـدى لـي أسـراره = تنكّر ما درى إني ما أغلي اللـي مـا يغالـي بـي
أنـا عينـي عـن المقفـي بهـا شيمـة و عـذّارة = ولا تبكـي علـى خلـنٍ تنكـر و أنكـر الطيـبـي
لعلـه كـان تـتبكـي علـى طريـاه واذكـاره = تكـوس مـن أزرقٍ ماينفعـه طــب التطابيـبـي
يلومـن واحـدٍ جعلـه طريـحٍ بــاول الغـارة = يطيـح إبسهلـةٍ مـا عنـده إلا الطيـر و الذيـبـي

آه و عـزتـالــي مـــــن حــيـــاةٍ عـصـيـبــة = بـيــن يـومـيـن و الـثـالـث فـجـتـنـي بـغـالــي
كـــل مـادفــع مصـيـبـة تبتـلـيـنـي مـصـيـبـة = يالله إنـــي دخـيـلـك مـــن تــعــوس الليـالـي
صابـنـي سـهـم قـاتــل مـــن عـيــونٍ غضيـبـة = وقّـعــت بـالـفـروخ الـنــادرة مــــن عيالي
ذاك يــزنــت زنــيــت و ذاك يــرفــع قـنـيـبـه = و المـصـايـب يـبــي لـــه طـاقــةٍ واحتمالي
أتعـنّـز عـلـى الـلـي مــا عـطـى الـنـاس غيـبـه = عـالــم الـكــون يــاربــي عـلـيــك اتكالي
أتعـنّـز عـلـى الـلـي مــن دعــى إسـمـه يجيبه = يالله أرجـيــك يـامـنـشـي صــــدوق الخيالي
تـرحـم الـلـي صـوابــه مـــع قـــرادة نصيبه = جت بالمنتهى يا رحمان لطفك بحالي
حـاش مـا كنيّـت العنـى مــن شــان شـقـرا ذويبـه = لا فـمــن شـــرّف الكـعـبـة عـزيــز الـجـلالـي
أسـهـر اللـيـل و أسـبـر كـــل نـجــم و مغـيـبـه = ذاك هـــرّف جـنــوب وذاك هــــرّف شمالي
صابـنـي مــن زمــان الـوقــت شـكّــة و ريبــه = مـــن عـيــون الـمـقـرّد جـعـلـهـن للـزوالــي
أزعــج الـصـوت عـالــي فـــوق راس الحديـبـة = مـثـل ذيــبٍ طــواه الـجــوع و الـجــو خـالــي
مـابـقـى لـلـرجـال الـيــوم شـيـمــة و هيـبــة = ضــاع وادي الـرمــى بـيــن طـامــن و عالــي

ألا ياضميري لا يغرّك هوى الشيطـان = تهيّض و أنا ذيـك السواليـف ناسيهـا
تهيّض على اللي كنها مطرق الريحـان = إلى هـزّه النسنـاس مالـت نواميهـا
أنا ما بلاي إلا أشقـرٍ كنّـه الشرطـان = عريـشٍ إلـى قضّـه تعـدى مثانيهـا
و إلى لاح لي خدٍ كما لمبـة الظهـران = خطيرٍ علـى كبـدي تفطّـر مكاويهـا
ألا ياعيـون مسلـطٍ أبـرق الجنحـان = إلى طقّهـا طـار اللحـم مـن ثناديهـا
ألا يا قدات العين ما تبـري الوجعـان = عطيب الجروح و حبـةٍ منـك تبريهـا
ألا يا ثمر قلبي جزى الإحسان بالإحسان = دخيلك تلافا الروح مـا بيـك تهفيهـا
على غير ذنبٍ سنّ بي سنّـة العـدوان = يجـوّد معاليـق الحشـا ثـم يلويـهـا
عسى من سعى بالحسد و مفارق الخلان = تقلّب عيونـه ملـح و المـوت يتليهـا

ألا يا زين قلي وش سبب هالصد والهجـران = بديتك بالسلام وتسفه الواجـب علـى شانـي
أحسبي يوم أسلّم لي بغاية خاطـرك ميـزان = وأثر ما زاد من زود الغـلا تاليـه نقصانـي
ألا يا صاحبي خفبي من اللّه وإرحم الوجعان = رعى اللّه من يراع المحسنين بصلح وإحساني
أفدني وش جرى مني و خل الزود و النقصان = لا تسكت بغيضك تجرحن يا شمعـة اعيانـي
أنا المجبور أنا المبلي بحبك يا غصين البـان = شقيت بعشرتك و أشقيتني يوم اللّـه أشقانـي
ألا ياروح روح مولعٍ ترقد و هـو سهـران = سبب حبك و هجرك عن لذيذ النـوم جزّانـي
إلى مني ذكرتك فزّ قلبـي وإستشـان بشـان = لو إنك دايمٍ هاجوس بالـي سـر و إعلانـي
أجاذب عبرتي في خاطري يا قايـد الغـزلان = أنـا أحسبـي مثـل مانـي تمنيتـك تمنّانـي

كل ما جيت أبصبر عن هوى الروح و أعذر = قالـت النفـس لـي رب الزمانيـن واحـد
دام خلّـك علـى أول عشرتـه مـا تنكّـر = لا تحاقـر نصيـبـك ياوسـيـع البـلايـد
مد حبل الرجا و اللي يبـى اللّـه مقـدر = دافع الوقـت و إصبـر و أخرتهـا فوايـد
ماش ماطيق راحـة دامـت العيـن تسهـر = كيف أبا أصبر و حظي بالهوى مـا يساعـد
لـو توسّـع ضميـري ساعتيـنٍ تـكـدّر = ياللّـه إنـي دخيلـك لا تطيـل الشـدايـد
لي عشيرٍ حبسني بالهـوى حبـسٍ أقشـر = ما درى وش مرام الشوق و الحـب كايـد
إن شكيـت المصيبـة قـال خلّـك تعـزّر = ما يبـرّق بحالـي مـا بقـي لـه شرايـد
لاعنـي بالمـوده راعـي القـرن الأشقـر = نقّـض الجـرح الأول بالجـروح الجدايـد
إن بغيت المواصـل قـال مجبـور ماقـدر = آه ياطـول وجـدي كـل يــومٍ بـزايـد
جعـل مـن لامنـي سـاق رجلـه تكسّـر = ياخـذ الحـول ماحلّـت عليـه الجـرايـد

يقول المولع اللي ما يجور ولا يـدان الجـور = عسى اللّه ينتصف من ولعوا قلبي و خلونـي
أنا عن ماتريد النفس يا حـظ النـدم مقهـور = إلى مني بغيت مواصلتهم حيـل مـن دونـي
ألا يا مجيب دعوة من دعاك بداجي الديجـور = أسالك يا إلهـي لا تطيـل فـراق مضنونـي
أنا اللي من تغاب الشمس لين إنه يشق النـور = و أنا فـي حالـةٍ ياحيلـة اللّـه لا تلومونـي
على شقر الذوايب جض قلبي جضة المكسور = و لا ينلام قلبٍ باشقـر المجـدول مقرونـي
إلى مني ذكرت اللـي جبينـه كنّـه البنـور = تنقّض جرحي اللي مندرس و إنباح مكنونـي
أحسب إن الليالي يوم تضحك لي فرح وسرور = ولكن ما دريـت إن شرهـا للنفـس مدفونـي
ألا يا عاذلين الروح روحي ما تطيـع الشـور = و لا لي صالحٍ من شوركـم تكفـون خلّونـي
أنا المفجوع أنا المبلي أنا المغرم أنا المجبور = أنا اللي من صخيف الوسط دايم تسهرعيونـي
أنا بحبال من بيده شقـاي و راحتـي ماسـور = ألا يا ويله من اللّه ربطنـي ربـط مجنونـي

آه و ويـلاه مـن بلـوى زمانـي = كيف أنا ملهود و النـاس أريحيّـه
ساهرٍ بالليـل نومـي مـا هنانـي = يـوم كـلٍ بالكـرى عينـه هنيّـه
يا حمد ياشـوق مجلّـي الثمانـي = إرشـدن بالـراي يازبـن الونيّـه
لي عشيرٍ بالهـوى حبـه كوانـي = و أحرقت قلبي ولا أدري وش نويّه
يوم قلت الهون يا خصر المثانـي = لا تلـوع الـروح تعدمهـا عليّـه
إرحمن يوم إن ربـي بـك بلانـي = راقب المعبود يـا صافـي الثنيّـه
قال أوريك القسـى عقـب الليانـي = يا معنّى القلـب و العيـن الشقيّـه
يا عذابي كـان مضنونـي جفانـي = بدّل الحسنـى و جازانـي بسيّـه
كان خلي في تلف روحي نوانـي = ضاعت الحيلـة ولا لـي مقدريـه

عفا اللّه عن عينٍ جداه البكـا و النـوح = تهضّم طـوال الليـل مـن فقـد غاليهـا
إلى قلت هيدي ما بكثر البكـا مصلـوح = تزايد بكاهـا و هاطـل الدمـع محفيهـا
من أسباب كل مصيبتي خاطري مجـروح = علـى جـادلٍ بالكبـد جـدّد عراقيـهـا
أنا قبل عرفي له مريح و خاطري مشروح = مريـحٍ و لا حنيـت لأجــل طاريـهـا
فلا شك واعـزاه قلبـي صـلاه الفـوح = على فقدها و النفس فيهـا اللـي مكفّيهـا
أنا من فراقه يا حمـد صابنـي سامـوح = فلا شك ما للنفـس عـن حكـم واليهـا
ألا حسبي على اللي ولعتني و أنا مشفوح = بمـزة ثمـانٍ كالعسـل بيـن أشافيـهـا
بعد ما إرجهن القلب و اشفت عليه الروح = تركني ألاعـي الـورق دايـم و أباريهـا
ترى ما أنت مني يا هنوف المها مسمـوح = على ويش قل لي يـوم حالـي موزّيهـا

عيني اللي تهامل مثل وبـل السحابـه = لاشتعل برقها ثـم أرزمـن الرعـودي
أتهضّـم و أجـاوب بالقنيـب الذيابـه = لين قلبي من الهاجوس بيّـح سـدودي
همي اللي عليه القلب غمـقٍ صوابـه = جعل يومٍ شقيت بعشرتـه مـا يعـودي
الهوى لا تغبط المغـرم اللـي شقابـه = كم صويبٍ رماه بمظلمـات اللحـودي
ذا و أنا خاطري مشفوف بأول شبابـه = لين جدّد على مدرس ضمانه إلهـودي
ما تبارح ضمانه لـو سحبـت الربابـه = كيف أبسلى و أنا عن ما بغيت محدودي
حدني عنـك يـا فتّـان نبـح الكلابـه = ودي آصلك مير أدرى عيون الحسودي
لو حياة العرب يا زين ركض و نهابـه = إجزم إنه ما على الرجّال شيٍ يكـودي
مير أنا أدرى عليك من الحسد و السبابه = مانبي هرجةٍ عوجا تعـدى الحـدودي
غرني واحـدٍ بالوجـه يـوري لبابـه = اللسان أجـودي لكـن قلبـه يهـودي
لو مقر الردى يسوى غسـول الجنابـه = و الله إني ما خل النقص يرجح بزودي

كل حيٍ عزا له ميت يوم العيـد قـاد الضحايـا = وآه أنا اللي نهار العيد لتلا العيد رحت الضحيـه
وينكم يا رجاجيل الشهامـة و الفخـر و الحمايـا = ليه إبن عمكم يوخـذ نهـار العيـد ببـلا دعيـه
صابني و إبتلاني من عليه مـن الغزيّـل حلايـا = عنقها و العيون السود و أذهبني بغنجـه و غيّـه
صابني بالدلع و العين و الغرة و حمـر الشفايـا = ما ترك لي مجال أعطيه علم و لا أدري وش نويّه
قلت للي سلب عقلي ترانـي ماحتمـل هالسوايـا = راع حالي رعاك الله بمعروفك و حلمـك عليّـه
لا تزيد الجروح الداميات بنـار عشـر الكوايـا = ثم تنزف على روحي جـروحٍ بالحشـا داخليّـه
ما توقعـت منـك إنـك تقابلنـي بسـود النوايـا = و أنت عندك خبر يا سيد روحي بالقضى والقضيّه
ليت الأقـدار عـن راع المـودة يدفعّـن المنايـا = لين راع الهوى ياخذ هواه من العيـون الجريّـه

سـقــا الله بــلادٍ جـوهــا بـيــن نــفــد و جـــال = مـن الـرايــح الـلــي مـدلـهــمٍ عـلــى مـنـشــاه
سـقـاهـا مـن الـنـاشــي عـلــى راس كــل هــلال = حــقــوقٍ دفـــوقٍ كـــل وادي مـــلى مــجـــراه
مـتـى مـا إجـرهـد الـلـيـل جـا لـلـسـحـاب ضـلال = عـلــى غـرســه الـرعّــاد وبـلــه يـنـثّــر مــاه
مـرابــي غــزالٍ مــا تـحـيّــل بـــه الـحــيّــال = وحـش و الـوحـش مــا كــل حــيٍ يـنــول حـمــاه
جـفــولٍ مــن الـريـحــه قـبــل شــوفــة الأزوال = و لا يـنـدرك لـو قـلـت ابـا امـشـي عـلـى مـمـشــاه
ألا يـا مـحـمــد ويــش أســوي عـلــى هـالـحــال = هـذا لـي سـنــه و أيــام صـابــر عـلــى فـرقــاه
عـسـى مـن شـبـكـنـي بـالـهـوى شـبـكـة الـحـبّـال = طــرف لـيـلــةٍ غــرّا تـوافــيــت أنـــا ويّـــاه
يـصـيـبـه مـثـل مـا صـاب قـلـبـي بـغـيـر إشـكـال = عـلـى شـان يـونــس والـمــودة يـشــوف اقـضــاه
خـذا الـعـقـل واقـفـى صـاحـبـي مـسـتـريـح الـبـال = وانـا اقـفـيـت مـسـلــوب مــن الـعـقــل واعــزاه
الا يــا بـعــد حـالــي ومــن لــي وراس الــمــال = دخـيـلــك بـروحــي ردهـــا واعـتــقــن لــلــه

ياخفيف الـدم يافتّـان يـا سمـر = أنت بك ميزه على كـل البناتـي
الخدود و مبسمٍ وعيـون تسحـر = و العواتق و النواهـد راكزاتـي
كنك الطاووس بالملبوس الاخضر = ياحلو ما حلاه من حدر العباتـي
يا صغير السن منك العين تسهـر = و الله إنك لي شريك في حياتـي
أتصبـر وأتجـبـر و أتعـبـر = و التمس عطفك و لطفك يا شفاتي
دالهٍ بالك وأنـا منـك الله أكبـر = ساهرٍ و أرعى النجوم الساهراتي
يا حلي اللي من الريحـه تذيّـر = يا زريف الطول يا ظبي الفلاتـي
يامدلـل يـا مدلّـع يـا مضمّـر = إمهلن بالموت لين أكتب وصاتـي

يا وجودي على اللي ساكنٍ بالوزاعـي = وجد من شيل مفلس عن طريق السفاره
يوم ضيّع فلوسه بـاع بـاق الأواعـي = شيل في ثوبـه اللـي قاطعيـنٍ زراره
قيل وين الجواز قال بالـدار ضاعـي = و إكتفته الحفيظه و أبرقـوا للـوزاره
ذا وجوده و أنا وجدي و للوجد داعي = يوم أقول آه واعـزاه ماهـي خسـاره
أتوجد علـى راع العيـون الوساعـي = وجد من ساقه الديّـان و إجتـاح داره
يوم قالوا بامـان الله صبـح الوداعـي = رحت بدري و أنا صدري تكسر إعباره
آه قصدير قلبي من لظى الحب ماعـي = من سموم الفراق أرث بقلبي حـراره
ياطويل المعنّق لـك عيونـي تراعـي = و أترجاك فرصة لو تجتنـي زيـاره
أنت فيك الحلا و الملح ماهو صناعـي = فوق خدٍ تخانق مـع بياضـه حمـاره

أنا أغليك يا ذوق يطابق علـى ذوقـي = أنا أغليك يا لابـس شعـار الهلاليـه
أنا أغليك من عقلي وفكري و منطوقي = هواوي و أحب أهل القلوب الهواويـه
أنا أغليـك يـادمٍ تمشيـت بعروقـي = على رغبـةٍ منـي ولا فيـه جبريـه
أنا أغليك من قلبٍ من الشوق محروقي = يعـد النجـوم بليـلـة المربعانـيـه
أنا أغليك ياسابق فخر مانت مسبوقـي = وراع الكحيلاء مـا يـذم الصويتيـه
ألا يا سحاب فيك رعّـاد و بروقـي = عسى الله يسوقـك للديـار الشماليـه

اللّه أكبـر يـا ثـلاثٍ قابلنـي = عقب ظهر العيد بالسوق التجاري
حافـلاتٍ هايـمـاتٍ للمغـنـي = و الثلاث من الضبا فيهن مواري
أحرجني و إطرحني وإجرحني = و إذبحني بالخناجر و السواري
قلت عيد اللّـه عليكـم عايدنـي = الهوى ما هوب طعنٍ بالشبـاري
التحدي و الخطا ما جـا بظنّـي = ليتني من قبل طعن القلـب داري
الطويل من الثلاث اللي طعنّـي = والصغير اللي خذا قلبي إجباري
قلت للثالث خطا وش جاك مني = يا هوى عيني تهل من العبـاري
ما جزاي إلا التوجـد والتمنـي = راح قلبي بيـن بيّـاعٍ وشـاري

ياعيوني وراكن تزعجن الدموعـي = ساهرٍ طول ليلي و الليالي طوالـي
طول ليلي تهلّن و الخلايق هجوعي = حسبي اللّه على اللي بالموده قضالي
آه يا ونّـةٍ منهـا تملّـع ضلوعـي = و الجسد قبلها غادن سوات الخلالي
من سبايب هنوفٍ طبعها طبق طوعي = في زمانٍ مضى و اليوم عزي لحالي
يا بو خديدٍ بضوحه مثل برقٍ لموعي = في سحابٍ يزلزل راسيات الجبالـي
صرت تالي زمانك ياحبيبي قطوعي = ضاع حبل المواصل و أخلفن الليالي
ليت عيني تشوفك مـرةٍ بالسبوعـي = كود يخضّر قلبي عقب دور الهمـال

يقول الشاعر اللي شاف من وقته جفا واجناف = تكدر ما صفا واختلفت الدنيا بأهاليها
ترا اللي ما يخزم إطبوعه اول والخزام إعساف = الى منه دنع لو حايله ما هوب قاويها
والى مني ذكرت اللي جفاني والدهر صرّاف = بديت أجضّ وعين الود سكاب عباريها
انا يوم الليالي مقبلات ما علي اخلاف = أهزّع من نبانيب الثمر واقطف نواميها
ولكن شانت الدنيا وخلي معطيٍ بإنكاف = تنكر والعداوه والجفا بانت مواريها
قطفنا من زماليق الهوى يوم الهوى مقطاف = ولكني بعد ما شانت المرّه مخليها
الى منه تنكر وأنكر اللي فات يا خلاف = أعده مات مع من مات وأمحي رسم طاريها
شربنا جمّها الصافي وصدرّنا بلا غراف = عسى من وردها عقبي يدهدم طيّها فيها
وانا عن ما مضى تايب وابزبن نايف المشراف = عسى عين تلد بغير ماله ما يهنيها

أسير الحب لو صاح القوايل لا تلومونه = ترا قصدير قلبه من وحم نار الهوى ماعي
الا يا عاذلين القلب كفوا لا تعذلونه = عذلتوا والقلوب الهايمه ما تسمع الداعي
عليه الهم خيّم والتعب والسهر لعيونه= سبب من لا جزاه الله صوابه بين الاضلاعي
بكى مجنون ليلى وان بكى ما نيب من دونه = انا اللي في بحر ميه وعشره يكفخ إشراعي
بلاي قماش من حدر القماش مذهّب لونه = لزمته ثم سمته سومة الصامل ولا باعي
وراكم يا هل المال المذهّب ما تبيعونه = عشقت المال نوعه شاقني من بدّ الانواعي
أحب السلعه اللي من بلدها ما يعرفونه = عليها شمعها ما روجت بالسوق مع ساعي
ثمان سنين ما غيرت زاد وسط ماعونه = والى قلت الحذيه من زهور الورد ما طاعي

يا قلبي اللي غدابه غيبة الشمسي = زول غنج لي واخذ قلبي وقفابه
اقفى وانا اصفق عليه الخمس بالخمسي = طلبت قلبي وصافي اللون عيابه
انته من الحور يا نهاب والا انسي = من ذا الذي في بلاد سعود نهابه
يا روح روحي خطر تصبح ولا تمسي = الروح من مستكن الروح يسرابه
يا كدلك اخضر مليح اللون والجنسي = من مصنعه ما يضيق صدر ركابه
يا عنك ما قيل له بالسوق يا تكسي = يحرم على اللي تمنى ما تمشابه
يا ورد يا موز مصيون عن اللمسي = عن جملة اهل الموده مغلق بابه
تفداك حالي ومالي يا هوى النفسي = وعيوني اللي تهل وحبك اسبابه
يالله بفضل آية التوراة والكرسي = يا محصي الكون والمخلوق بكتابه
تصخر وليف حمسني بالهوى حمسي = يذبح بنجل تشوف الموت لاغضابه
أدخل على الله بجاه عيونك الخرسي = ومبيسم كن هيجن هيج بعذابه
يا سيدي ما ومرك الله على حبسي = خف بي من الله ترا المظلوم له جابه

الله من ونةٍ جريتها ما حدٍ فطن لي = تحزّ باقصى الضمير وجاحدٍ اربع ليالي
اشوف شي يغيض النفس واقول متسلي = ما ودي ابدي سريرة خاطري يفكر بحالي
كني مريض ثلاث سنين من زود التغلي = يالله انا أرجيك يا منشي مراهيش الخيالي
تصخر وليف غرير بالتغلي قاضي لي = أظهر علي نجوم القايله واعزتالي
ليت المصيبه من اقصى الناس ما هي من محلي = اشوى ولا علةٍ تبدى من العرق الموالي
كان ان شفّك بغيري يا حياة الروح قلي = انت المخير وانا حقك علي اطوي حبالي
من باعني بالرخا بعته عسى قربه يولي = والله ما غلي هنوف عندها مانيب غالي
والله فلا يطرد المقفين رجل يستدلي = خلك بفالك يا صاحبي وانا خلن بفالي

ياللي رثعتي بالعقول الرزينه = وشلون فعلك بالعقول المهابيل
هذا تخمينه وذا تطرحينه = واللي سلم ما صيب ما يمرح الليل
عز الله اني شايفٍ منك عينه = ياللي على شقح البني بك تنافيل
اصبحت عيني من فراقك حزينه = عزاه من فرقاك ومطاول الطيل
يا رب تلحفني جناح السكينه = قدّام لا تقضي علي الغرابيل
اللي ذبحني في حجاجه وعينه = سودا طبيعه ما سواده من الميل

يالله يا جابر عزا من دعاك = تروف بي وانت بحالي بصير
يا منزل الماء من روايح سماك = فيك التجي واسترحمك واستجير
انا بحلمك صابرٍ في رجاك = تصخر حبيبٍ في حياتي خشير
يا من بحسن الخلق ربي عطاك = حيرت رجلي بالفضا لا تسير
مجبور قلبي مغرم في هواك = احرقت روحي يا قدات النظير
ان مت عمري يا حبيبي فداك = حيل الله اقوى والمدبر بصير
يالله عسى من لامني في غلاك = رجله ثلاث سنين عظمه كسير

حيل الله اقوى حديت القايله حدي الشرودي = يا من خبر واحد يحدى الضحى قدام داره
اللي حداني بليا حرب ومراهيف وجنودي = متهددن بالهجوم وشنّه المذهوب غاره
أصيح مير العرب كنه عن الفوضى رقودي = ما كن في هالبلد للمشكله شرع واماره
لو ان فيها نظام وعندهم شرع وحدودي = ما راح عمري على اللي همهم همي خساره
لا واحسايف على اللي عيدهم ساعة وجودي = اللي على شوفتي يعطي الهدايا والبشاره
فارقتهم والموده جددت مدرس اللهودي = تحزّ كبدي حزّ الخشب موس النجاره
انا قتيل العواتق والمفارق والنهودي = ومدعجات على سفك الدما معهن جساره
والى تبسّم بغرٍ كنهن ضي الرعودي = ولّع بطبلون قلبي واشتعل سلك الحراره
يا زين وين الصداقه والوثايق والعهودي = ايام روض الموده بيننا يجذب خضاره
بدلت ذيك السوالف والتوالف بالصدودي = واسقيتني عقب مشروب الهنا كاس المراره
طاوعت بي يا حياتي هرج نمام وحسودي = الله يحسد الحسود اللي قبس للبغض ناره

آه ياللي بنار الشوق حبه كواني = بس اخيله بعيد وعذبتني إشطوني
كل ما زرت حيه عند بيته دعاني = وان تمايلت يمه سكّر الباب دوني
ليه تلعب بقلبي يا قليل الحساني = ما حصل منك تنفعني ولا تتركوني
أفتح الباب وعطني العلم ما به مثاني = لا تعذّر على مثلي تزيد الغبوني
انت سالي وانا ذقت النكد من زماني = لا تفرج على هالحال يكفيك لوني
أتصبر وطول الصبر زاد إمتحاني = واترجاك وأرجي الله يحقق ظنوني
لو تكرم تزورن ساعةٍ في مكاني = والله اني لاشيلك في محاجر عيوني
انت لك منزلٍ بين الضلوع المحاني = يا مخلص ديونك خلصن من ديوني
لك حنانٍ بقلبي ما نطقبه لساني = يشهد الله علي ما كنّ لك صدقوني

إستانسوا دام ابوكم حي = عزيلكم وان لحق خاله
دامك جويهل بسن الغي = ما تعرف الوقت وأشكاله
أخاف يوم يزيل الفي = وتصبح الحال يرثاله

يا وجودي وجود اللي حلاله وحيله = سبعة أشهر على ( الرقعي ) حديده نثاير
شيّن ببطن القليب وشيٍ فوق النثيله = غير شين المراح وكل يومٍ خساير
طايحن بالدبادب والمسافه طويله = كل ماصبحت من صبحٍ والى العج ثاير

قايد الريم ذكاني على غير يمه = قادني للدرك قود الوصي للضحيه
قلت يا حبيبي خلك بعطيك كلمه = لا تعجل بذبحي خل ابكتب وصيه
آه يا من رماني في غرامه ودمه = زاد بي ما جرالي فوق تسعين كيه
يا محمد دخيلك وصل العلم يمه = خبره بالعلوم البينه والخفيه

انا بوادي خلا والناس في وادي = روحي مع الفكر والتفكير منسجمه
أسبح مع الليل لين الصبح ينقادي = وأقنب كما ذيب عوا عالي رجمه
حتى سمعت الخبر في موجة الرادي = باللي على الخصم فاز وسدد الهجمه
كل يطوح بعالي الصوت وينادي = عاش راس الفريق وعاشت النجمه
تكفون يا لابتي يا نسل الاجوادي = اصحى يخيفك فريق مطور حجمه